Žančyn-kantraloraŭ na ŭvachodach u minskaje mietro zamieniać inśpiektary słužby biaśpieki
Prykładna da siaredziny 2018 hoda na ŭsich stancyjach mietro žančyn-kantraloraŭ na ŭvachodach zamieniać inśpiektary słužby biaśpieki, raspavioŭ ahienctvu «Minsk-Naviny» pres-sakratar HP «Minski mietrapaliten» Andrej Kuźmin.
U padziemcy pastupova skaračajecca kolkaść kantraloraŭ na aŭtamatyčnych kantrolnych punktach, funkcyi jakich da niadaŭniaha času vykonvali vyklučna žančyny. Ich abaviazki na mnohich stancyjach užo pieradadzienyja inśpiektaram słužby biaśpieki pradpryjemstva.
«My pačali taki ekśpierymient z najmienš zahružanych stancyj — «Pieršamajskaj» i «Kupałaŭskaj», — raspavioŭ Kuźmin. — Siońnia na ŭsioj 2-j linii, akramia troch stancyj — «Maładziožnaj», «Kuncaŭščyny» i «Kamiennaj Horki», zamiest kantraloraŭ na AKP pracujuć supracoŭniki słužby biaśpieki mietrapalitena. U kožnym viestybiuli ich pa dvoje».
Na 1-j linii takaja ratacyja kadraŭ pačniecca, pa słovach surazmoŭcy, u druhim paŭhodździ 2017-ha, i prykładna da siaredziny nastupnaha hoda na ŭsich astatnich stancyjach žančyn-kantraloraŭ na ŭvachodach zamieniać inśpiektary słužby biaśpieki.
