Aryštavany ŭ Rasii handlar mašynami «Aŭtatata» patrabuje pierakładać jamu ŭsie dakumienty na biełaruskuju movu
Viarchoŭny sud Rasiei pazbaviŭ apošniaj nadziei zasnavalnika TAA «AŭtaChoŭmKampani», viadomaha jak aŭtachaŭs «Aŭtatata», Vitala Šukana paźbiehnuć suda ŭ Biełarusi.
Biznesmien byŭ va ŭciokach ź leta 2015 hoda, a zatrymali jaho ŭ Maskvie ŭ kastryčniku minułaha hoda. Viartacca dadomu 36-hadovy Šukan nie chacieŭ i ŭsialak pieraškadžaŭ svajoj ekstradycyi. U Biełarusi jon abvinavačvaŭsia ŭ machlarstva na sumu 460 365 denaminavanych rubloŭ.
Pa dadzienych śledstva, sa žniŭnia 2012-ha pa 2014 hod supracoŭniki aŭtachaŭsa «Aŭtatata», a taksama dvoje indyvidualnych pradprymalnikaŭ pad padstavaj realizacyi atrymanych na kamisijny prodaž aŭtamabilaŭ padmanuli kala 40 hramadzian.
U žniŭni 2016 hoda zmoŭščyki Vitala Šukana, u liku jakich jaho žonka i brat, byli asudžanyja da 7 i 8 hadoŭ źniavoleńnia. U studzieni hetaha hoda prysud ustupiŭ u zakonnuju siłu. Zasnavalniku «Aŭtataty» ŭdałosia schavacca ad śledstva. Pavodle papiaredniaj infarmacyi, Šukan u červieni 2015 hoda vyjechaŭ razam z žonkaj i dziećmi ŭ Rasiju, dzie niekatory čas žyŭ u znajomych. Zatym siamja viarnułasia ŭ Biełaruś, žančyna nieŭzabavie była zatrymanaja, a jaje mužu znoŭ udałosia schavacca ŭ susiedniaj krainie.
Z Rasii Šukan staŭ słać paviedamleńni rodnym, raspaviadaŭ, što ź im usio dobra, jon ich nie pakinie i ŭžo znajšoŭ advakata, jaki abvierhnie ŭ sudzie ŭsie pakazańni paciarpiełych i vyzvalić usich z turmy. U chodzie vyvučeńnia hetych pasłańniaŭ apieratyŭniki źviarnuli ŭvahu na prysutnaść u tekstach zvarotaŭ z carkoŭnaj leksiki. Heta dało padstavu vykazać zdahadku, što ašukaniec moža chavacca ŭ jakim-niebudź manastyry. Vyličyli i zatrymali Šukana ŭ Maskvie kala adnaho z manastyroŭ.
Hienieralnaja prakuratura Biełarusi źviarnułasia ŭ Hienieralnuju prakuraturu Rasii z zapytam ab vydačy Šukana dla pryciahnieńnia jaho da kryminalnaja adkaznaści. Zapyt byŭ zadavoleny, adnak «Aŭtatata» byŭ suprać i abskardziŭ hetaje rašeńnie ŭ sudach. Charakterna, što Vital Šukan adrazu paśla zatrymańnia śpiarša źviarnuŭsia z zajavami ŭ pradastaŭleńnie jamu prytułku, a zatym chadajničaŭ ab pradastaŭleńni jamu hramadzianstva Rasii.
U sudach Šukan skardziŭsia na parušeńni jaho prava na abaronu, pa niekalki dzion znajomiŭsia z materyjałami spravy, a potym admaŭlaŭsia ich čytać, patrabujučy pierakładu dakumientaŭ na biełaruskuju movu: mužčyna spasyłaŭsia na «nierazumieńnie ruskamoŭnych jurydyčnych terminaŭ». Charakterna, što ŭ chodzie sudovaha razboru Šukan svabodna razmaŭlaŭ na ruskaj movie i nie prasiŭ rabić dla jaho pierakład na biełaruskuju movu.
U Apielacyjnym vyznačeńni sudovaj kalehii pa kryminalnych spravach Viarchoŭnaha suda RF adznačajecca: «Pry takich abstavinach admova Šukana znajomicca z materyjałami spravy ŭ poŭnym abjomie nie źjaŭlajecca vymušana i śviedčyć nie ab parušeńni jaho prava na abaronu, a na sprobu padoŭžyć termin sudovaj pracedury razhladu jaho skarhi da zakančeńnia terminu ŭtrymańnia pad vartaj».
Karaciej kažučy, rasijskaja Fiemida ŭciekača raskusiła i NIE znajšła padstaŭ dla zadavalnieńnia jaho skarhi. Ekstradycyja Šukana ŭ Biełaruś — pytańnie času.