Polšča nie stała źnižać z 1 červienia minimalnuju sumu pakupak dla viartańnia TaxFree
Polšča nie stała źnižać z 1 červienia minimalnuju sumu pakupak dla viartańnia TaxFree. Kab viarnuć PDK ad pakupak u hetaj krainie, pa-raniejšamu treba nabyć tavary na sumu nie mienš za 300 złotych (kala 80 dalaraŭ).
Raniej polskija ŚMI sa spasyłkaj na Minfin paviedamlali ab tym, što z 1 červienia Polšča maje namier źnizić minimalnuju sumu pakupak dla viartańnia TaxFree z 300 złotych (80 dalaraŭ) da 200 (kala 53 dołaraŭ). Hetaje rašeńnie, pa dadzienych «Polskaha radyjo», było abumoŭlena tym, što ŭ 2016 hodzie źniziŭsia «abarot małych, siamiejnych pradpryjemstvaŭ, jakija ŭdzielničajuć u sistemie TaxFree».
Adnak, jak paviedamili čytačy, z pačatku leta minimalnaja suma dla afarmleńnia TaxFree zastałasia raniejšaj — 300 złotych. Hetuju infarmacyju taksama paćvierdzili polskija mytniki.
— Pajechali na šopinh u Biełastok, dzie ŭ kramie ŭdakładnili ŭ pradaŭca, ci źnizili sumu, nieabchodnuju dla afarmleńnia TaxFree. Jon skazaŭ, što ŭpieršyniu pra heta čuje. I minimum, jak i raniej, - 300 złotych, - raspaviadaje minčuk Andrej. - Toje ž samaje nam skazaŭ mytnik, jaki afarmlaje TaxFree na polskaj miažy.
Pres-sakratar Mytnaj pałaty ŭ Biełastoku Maciej Čarniecki paviedamiŭ, što dla viartańnia PDK ad pakupak u Polščy treba kupić tavary na sumu nie mienš za 300 złotych, i što ab płanach polskaha ŭrada datyčna źnižeńnia hetaj sumy jamu nieviadoma.
- Zhodna z rasparadžeńniem ministra finansaŭ ad 1 krasavika 2016 hoda, minimalnaja suma, pry jakoj padarožnik maje prava pretendavać na viartańnie PDK z tavaraŭ abo pasłuh, siońnia znachodzicca na ŭzroŭni 300 złotych, - paviedamiŭ Maciej Čarniecki.
