Alaksandra Bajaryna: Anhielskaja i ruskaja mova patrebny dla taho, kab žyć i pracavać, biełaruskaja dla taho, kab być
«Dumaju pra ŚMI i pra toje, što jany stvaryli za ŭsie hetyja hady. Jak mnie dumajecca, siońnia abvastryłasia roźnica pamiž materyjałami PRA BIEŁARUŚ i materyjałami PA-BIEŁARUSKU. Pra Biełaruś možna pisać biaskoncyja karysnyja teksty, ale ŭsie jany ŭ vyniku čamuści akazvajucca na akupacyjnym baku, — napisała ŭ svaim fejsbuku architektarka Alaksandra Bajaryna. —
Možna 25 hadoŭ pisać pra Kalinoŭskich, pra biełaruskija siadziby, pra biełaruskuju kulturu, pra biełaruskuju litaraturu, pisać ščyra i jakasna i pry hetym stać čarhovym ćvikom u trunie biełaruskaj kultury. I vyklučeńniaŭ nie baču. Artykuły PRA Biełaruś — heta rubryka «v mirie životnych».
Jaki cikavy śviet žyviołaŭ, jakija kłasnyja pieradačy, jak cudoŭna hladzieć ich, kali zachočacca, i vyklučać ich, jak nadakučyć.
I byccam nichto nie vinavaty ŭ hetym, ludzi ŭžo dakładna nie niasuć za heta adkaznaść. A ŚMI niasuć adkaznaść. Niedziaržaŭnyja ŚMI, skažam tak.
Moža, i nie stali b takija pavodziny ŚMI trahiedyjaj, kali b nie stan hramadstva, jakoje źmianiłasia za hetyja hady.
Vymirańnie vioski adbyvałasia adnačasova, viaskovyja nośbity movy vymirali i imknucca dasiahnuć ŭ svajoj kolkaści nula, rubryka «v mirie životnych» pracuje bieź pierapynku i punkt sustrečy nula z rubrykaj moža stać niejkim zaŭvažnym vuzłom historyi.
Važna zrazumieć, što narmalna być ruskamoŭnym maładym biełarusam z saviecka-postsaviecka-ruska-biełaruskim nutrom, kali ŭ ciabie jość biełaruski tył. I zusim inšaja sprava paśla śmierci ŭsich tyłoŭ stać samim tyłam dla svaich dziaciej.
Biezumoŭna, nie tolki ŚMI adkaznyja za ŭsio heta i dola ich adkaznaści ŭ paraŭnańni ź dziejańniami inšych adkaznych zusim nievialičkaja.
Prosta chaciełasia skazać, što ŭsia ich šmathadovaja ruskamoŭnaja praca na karyść Biełarusi heta nie tolki pšyk u pavietry, ale i realnaja siakiera ŭ kryvi.
Nam z vami, siabry, nieabaviazkova było karystacca movaj, bo žyła naša vioska. A siońnia tolki my, žychary haradoŭ, možam vypravić situacyju.
Pierajści samim na movu składana, ale nie składana dać jaje dzieciam, patrabavać daskanałych viedaŭ. Jak patrabavać i viedaŭ anhielskaj.
Anhielskaja i ruskaja mova patrebny dla taho, kab žyć i pracavać, biełaruskaja dla taho, kab być», — piša Alaksandra Bajaryna.
Bajaryna sama pierajšła na biełaruskuju movu ŭžo darosłaj, i ciapier haduje svajo dzicia pa-biełarusku. Jana zamužam za dyzajnieram i pradprymalnikam Vadzimam Prakopčykam.
