Historyja Biełarusi ŭ 24 trekach
Vakalist hurtu Dzieciuki Aleś Dzianisaŭ prezentuje na TuzinFM svoj solny albom «Karotkaja historyja Biełarusi», zapisany na słovy ślapoha paeta sa Skidzielu Alesia Čobata.
Pa pieśniach z hetaha albomu sapraŭdy možna vyvučać historyju krainy: zasnavańnie haradoŭ, časy VKŁ, Paŭnočnaja vajna, paŭstańnie Kalinoŭskaha, Paniatoŭski, Mickievič, Bahdanovič, Taraškievič… Padziei, asoby dy ich (piera) asensavańnie — usio heta jość u «Karotkaj historyi Biełarusi».
Mienavita pad takoj nazvaj u 2014 hodzie pabačyŭ śviet zbornik Alesia Čobata, jaki natchniŭ haradzienskaha muzyku Alesia Dzianisava na zapis albomu pavodle hetych vieršaŭ. «My znajomyja ŭžo daŭno z Alesiem Fiodaravičam i mianie vielmi kranajuć jahonyja vieršy. Ja liču, što heta hienijalny paet, jaki vydatna adčuvaje jak minułaje, tak i budučyniu», — zaznačaje muzyka. Jašče na etapie vybaru vieršaŭ Aleś sutyknuŭsia ź mierkavańniem adnaho znajomaha muzyki, jaki skazaŭ, što ź vieršaŭ Čobata niemahčyma zrabić pieśni, nadta jany ŭžo niemuzyčnyja. Ale Dzianisaŭ svajoj pracaju abvierhaje hetuju tezu.
Spačatku mierkavałasia zapisać «Karotkuju historyju» razam z hurtom «Ludzi na bałocie», ale hurt u hety peryjad praktyčna prypyniŭ svaju dziejnaść, tamu Aleś vyrašyŭ zapisać pieśni samastojna. Jon pracavaŭ nad albomam ciaham dvuch hadoŭ. Na adnu pieršych zapisanych piesień «Turma» akurat tady byŭ źniaty klip. A sioleta asobnym synhłam prezentavaŭ śpieŭ «Kali nad łuham busieł pralacieŭ». Jon prysutničaje na dysku ŭ dvuch varyjantach — pad adnu hitaru, jak i ŭsie astatnija pieśni i ŭ versii, zapisanaj razam z hurtom Race Of Dreamers. Jašče dźvie pieśni «Epiłoh» i «Stanisłaŭ Aŭhust Paniatoŭski» byli zroblenyja razam z hurtom Dzieciuki dla albomu «Recha». Ciapier hetyja tvory možna pasłuchać i ŭ akustyčnym varyjancie. Usiaho było zapisana 25 piesień, adna ź ich ź inšaha zbornika Alesia Čobata, tamu jana nie ŭvajšła ŭ hety albom, zatoje budzie vykarystanaja ŭ budučym albomie «Dzieciukoŭ».
Prezentacyja albomu «Karotkaja historyja Biełarusi» projdzie ŭ vieraśni ŭ Harodni, Viciebsku, Miensku. Aleś Dzianisaŭ źbirajecca i nadalej zajmacca solnym prajektam. Nastupnaja meta — ažyćciaŭleńnie daŭniaj mary: albom na vieršy Ŭładzimiera Karatkieviča.
