Brytaniec pakuryŭ u samalocie — i atrymaŭ dzieviać hadoŭ turmy
Samalot kiravaŭsia ŭ Jehipiet
U 2015 hodzie brytaniec Džon Koks zładziŭ pažar na borcie samalota, pakuryŭšy ŭ prybiralni. Pieršapačatkova jon byŭ prysudžany da 4,5 hoda turmy, adnak ciapier hety termin pavialičany bolš čym udvaja.
Apielacyjny sud pahadziŭsia z dovadami prakurora ab tym, što pieršapačatkovy prysud byŭ praźmierna miakkim, i pavialičyŭ pakarańnie Koksu da dzieviaci hadoŭ i šaści miesiacaŭ pazbaŭleńnia voli.
U 2015 hodzie kamandzir pavietranaha sudna, jaki lacieŭ ź Birminhiema ŭ jehipiecki kurortny Šarm-eš-Šejch, pasłaŭ sihnał SOS i zapytaŭ avaryjnuju pasadku ŭ bližejšym aeraporcie.
Pryčynaj hetaha staŭ pažar, učynieny na borcie samalota 46-hadovym Džonam Koksam, jaki vypivaŭ pierad palotam i padčas jaho, paśla čaho vyrašyŭ pakuryć u prybiralni.
Samalot z bolš čym 200 pasažyrami na borcie znachodziŭsia na vyšyni bolš za 10 tysiač mietraŭ i na adlehłaści kala 160 kiłamietraŭ ad uźbiarežža Jehipta, kali ekipaž paviedamiŭ kapitanu, što nie moža patušyć ahoń u śmietnicy prybiralni.
Na dapamohu ekipažu pryjšoŭ adzin z pasažyraŭ, jaki pracavaŭ u pažarnaj vyratavalnaj kamandzie, i ŭ vyniku samalot pryziamliŭsia.
Kapitan, jaki adlataŭ 20 hadoŭ, skazaŭ, što nikoli nie mieŭ spravu z nastolki patencyjna niebiaśpiečnaj situacyjaj.
U studzieni ŭ Birminhiemie prajšoŭ sud, na jakim Koks pryznaŭ svaju vinu i pahadziŭsia z tym, što jaho dziejańni nieśli pahrozu žyćciu.
U chodzie apielacyi abarona Koksa nastojvała na źmiakčeńni prysudu, dakazvajučy, što ŭ momant ździajśnieńnia złačynstva Koks znachodziŭsia ŭ depresii, bo pieražyvaŭ niadaŭniuju śmierć maci i prablemy ŭ šlubie.