Na samicie NATA ŭ Brusieli Tramp adšturchnuŭ premjera Čarnahoryi VIDEA
Getty Images
Čarnahorski premjer Duška Markavič zajaviŭ, što navat nie zaŭvažyŭ, jak prezident ZŠA Donald Tramp adšturchnuŭ jaho padčas rasstanoŭki palitykaŭ dla kalektyŭnaj fatahrafii na samicie NATA. Videa, na jakim Tramp šturchaje čarnahorskaha premjera, šyroka razyšłosia pa internecie.
«Ja hetaha navat nie zaŭvažyŭ. Ja tolki ŭbačyŭ reakcyju na heta ŭ sacyjalnych sietkach. Heta prosta biaskryŭdnaja situacyja», - skazaŭ Markavič žurnalistam, pieradaje Asašyejted pres.
Na kadrach, jakija pakazali suśvietnyja ŚMI i aktyŭna tyražujucca ŭ sacsietkach, vidać, jak Tramp prabirajecca napierad siarod inšych haściej samita NATA i pry hetym davoli biescyrymonna adsoŭvaje premjera Čarnahoryi, jaki apynuŭsia ŭ jaho na šlachu. Paśla hetaha prezident ZŠA papraŭlaje pinžak i prymaje cyrymanijalnuju pozu.
Sam Markavič zaklikaŭ nie źviartać uvahu na hety epizod.
«Siońnia ŭ mianie była ŭnikalnaja mahčymaść asabista padziakavać prezidentu Trampu za jaho padtrymku, za chutkuju ratyfikacyju pratakoła [ab ustupleńni Čarnahoryi ŭ NATA] ŭ sienacie ZŠA, u cełym za padtrymku ZŠA intehracyi Čarnahoryi ŭ aljans», - cytuje čarnahorskaha premjera Si-bi-es.
«Tak jak siońnia žurnalisty ŭsialak abmiarkoŭvajuć hetuju scenu, ja chaču skazać vam, što dla prezidenta ZŠA naturalna być u pieršym šerahu», - skazaŭ na zakančeńnie Markavič.
Pres-sakratar Biełaha doma Šon Spajsier, u svaju čarhu, zajaviŭ, što rasstanoŭka palitykaŭ pierad kamieraj u adpaviednaści z pratakołam była vyznačana zahadzia, tamu Tramp pavinien byŭ zaniać svajo miesca.
