Biełaruś i Łatvija prymuć čempijanat śvietu pa chakiei ŭ 2021 hodzie
Rašeńnie pra heta było pryniata na kanhresie IIHF u Kiolnie.
Čempijanat projdzie z 7 pa 23 maja 2021 hoda ŭ Minsku i Ryzie. Takim čynam sumiesnaja biełaruska-łatvijskaja zajaŭka pieramahła zajaŭku ad Finlandyi (55 hałasoŭ suprać 52).
Matčy hrupavoj stadyi i pa dva čverćfinalnyja pajadynki ČS-2021 prymuć «Minsk-Arena» (umiaščalnaść 15 086 hledačoŭ) i «Arena-Ryha» (10 300). Paŭfinalnyja ža matčy, a taksama hulni za bronzu i zołata adbuducca ŭ Minsku.
Dla sumiesnaha turniru Biełaruś i Łatvija vybrali słohan «Straść. Bieź miežaŭ».
Biełaruś pravodziła ČS u 2014 h., spačatku padavała zajaŭku asobna, a potym vyrašyła abjadnać vysiłki z Łatvijaj.
ČS u 2018 h. projdzie ŭ Danii, u 2019 h. u Słavakii, u 2020 h. u Šviejcaryi.
***
U čempijanatach śvietu biare ŭdzieł 16 kamandaŭ, jakija raźbityja na dźvie hrupy pa vosiem zbornych. Adna hrupa budzie hulać u Minsku, druhaja — u Ryzie. Raniej vykazvałasia mierkavańnie, što zbornaja Rasii budzie hulać u Minsku.
