Vakulčyk pakinuŭ pasadu kiraŭnika Fiederacyi bijatłona
Novym kiraŭnikom Biełaruskaj fiederacyi bijatłona abrany były hałoŭny trenier nacyjanalnaj zbornaj Andryjan Cybulski, paviedamlaje Tut.by sa spasyłkaj na pres-słužbu BFB.
Valeryj Vakulčyk, fota biathlon.by
Na pasadzie kiraŭnika bijatłonnaj fiederacyi Andryjan Cybulski źmianiŭ staršyniu KDB Valeryja Vakulčyka, jaki ciapier uznačaliŭ nahladalny saviet BFB. Takoje rašeńnie pryniataje 16 maja na pazačarhovaj respublikanskaj spravazdačna-vybarnaj kanfierencyi HA «Biełaruskaja fiederacyja bijatłona». Kandydatura Andryjana Cybulskaha była adnahałosna padtrymanaja ŭdzielnikami kanfierencyi.
Namieśnikam kiraŭnika fiederacyi staŭ Ihar Kuźniacoŭ.
Valeryj Vakulčyk kiravaŭ Biełaruskaj fiederacyjaj bijatłona z sakavika 2013 hoda, kali źmianiŭ Vadzima Zajcava, jaki pakinuŭ pasadu ŭ BFB uśled za sychodam z pasady staršyni KDB.
Novaabrany kiraŭnik Biełaruskaj fiederacyi bijatłona Andryjan Cybulski adznačyŭ, što hałoŭnymi zadačami fiederacyi stanuć «biezumoŭnaja pierajemnaść u pracy raniejšaha kiraŭnictva, u tym liku styl i praktyka kiraŭnickaj dziejnaści z nacelenaściu na praktyčny vynik; intensiŭnaja i jakasnaja padrychtoŭka nacyjanalnaj kamandy da XXIII Alimpijskich hulniaŭ u Pchienčchanie; realizacyja raspracavanych inavacyjnych pryncypaŭ i mietadaŭ padrychtoŭki reziervu».
Zaćvierdžanaja taksama novaja redakcyja statuta BFB, jakaja adpaviadaje ŭstanoŭkam kiraŭnika Biełarusi, prezidenta Nacyjanalnaha alimpijskaha kamiteta Biełarusi Alaksandra Łukašenki pa raźvićci alimpijskich vidaŭ sportu, — adznačyli ŭ bijatłonnaj fiederacyi.
Delehatami kanfierencyi abranyja kirujučyja orhany fiederacyi: prezidyum, naziralny saviet, kantrolna-revizijnaja kamisija.
Andryjan Cybulski. Fota: Dzianis Kaściučenka, Bijatłon Anłajn
Novy kiraŭnik Biełaruskaj fiederacyi bijatłona Andryjan Alaksiejevič Cybulski naradziŭsia 19 sakavika 1969 hoda ŭ vioscy Biełaje Połackaha rajona Viciebskaj vobłaści. U 1983 hodzie pad kiraŭnictvam Alaksandra Šakleina pačaŭ zajmacca bijatłonam. U 1991 hodzie skončyŭ Viciebski dziaržaŭny piedahahičny instytut imia Kirava pa śpiecyjalnaści «Fizičnaje vychavańnie». Maje spartyŭnaje zvańnie majstra sportu SSSR pa bijatłonie (1990 h.), Zasłužany trenier Respubliki Biełaruś (2010 h.).
Z 1991 hoda pa 1992 hod pracavaŭ trenieram-vykładčykam pa bijatłonie ŭ Viciebskaj SDIUŠAR, z 1992 hoda pa 1995 hod — u Navapołackim dziaržaŭnym vučyliščy alimpijskaha reziervu. U pieryjad z 1995 hoda pa 1997 hod zajmaŭ pasadu staršaha treniera Minabłsavieta «Dynama» pa bijatłonie, z 1997 hoda pa 2000 hod — u Respublikanskaj škole vyšejšaha spartyŭnaha majsterstva pa zimovych vidach sportu.
Z 2000 hoda pa 2006 hod pracavaŭ staršym trenieram nacyjanalnaj kamandy Biełarusi pa bijatłonie. U hety pieryjad pad kiraŭnictvam Andryjana Cybulskaha ŭpieršyniu byŭ realizavany novy padychod u arhanizacyi raboty servis-hrupy. Z 2006 hoda pa 2007 hod źjaŭlaŭsia staršym trenieram žanočaj nacyjanalnaj kamandy Biełarusi. Z 2007 hoda pa 2013 hod — hałoŭny trenier žanočaj nacyjanalnaj kamandy, a z 2013 hoda pa 2016 hod — hałoŭny trenier abjadnanaj nacyjanalnaj kamandy Biełarusi.
Z 2007 hoda pad kiraŭnictvam hałoŭnaha treniera Andryjana Cybulskaha spartsmienki žanočaj nacyjanalnaj kamandy pa bijatłonie zavajavali 5 alimpijskich miedaloŭ, ź ich 3 załatyja, 6 miedaloŭ na čempijanatach śvietu, ź ich 2 załatyja; šmatlikija ŭznaharody na čempijanatach Jeŭropy, junijorskich pieršynstvach śvietu i etapach Kubka śvietu. Darja Domračava stała pieramožcaj Kubka śvietu-2014/15, uładalnicaj 5 małych Kryštalnych hłobusaŭ Kubka śvietu pa bijatłonie.
Hanaravany zvańniem Zasłužanaha treniera Respubliki Biełaruś. Uznaharodžany Ordenam Ajčyny III stupieni, nieadnarazova zaachvočvaŭsia kiraŭnictvam Ministerstva sportu i turyzmu i Biełaruskaj fiederacyi bijatłona.
