Biełaruski skuplajuć u piensijanieraŭ harodninu i stvarajuć šedeŭry fłarystyki
Prajekt «Babulin časnyk», jaki prapanoŭvaje amataram naturalnaj pryhažości takija modnyja ciapier jadomyja bukiety na zamovu, upieršyniu aktyŭna zajaviŭ pra siabie hetaj viasnoj. Hałoŭnaje adroźnieńnie novaha hulca na rynku fłarystyki ŭ tym, što dla svaich kampazicyj jaho stvaralnicy vykarystoŭvajuć składniki z hradak babul ci dziadul, jakich my možam bačyć la pierachodaŭ ci na kirmašach.
Ideja dapamahać piensijanieram z realizacyjaj tavaraŭ pryjšła ŭ hałavu byłoj studentcy i siońniašniaj supracoŭnicy Biełaruskaha dziaržaŭnaha ekanamičnaha ŭniviersiteta Alenie Hałamazavaj.
Alena Hałamazava.
«Pieršapačatkova mnie zachaciełasia stvaryć internet-kramu, dzie my b mahli lehalna pradavać naturalnyja pradukty ad našych piensijanieraŭ. Adnak nie ŭličyli tych ludziej, jakija nie zajmajucca hetym u vialikich abjomach, a majuć usiaho niekalki hradak kala doma dla dadatkovaha zarobku ci ŭ jakaści chobi. Voś jak raz dla ich i byli prydumanyja bukiety», — raskazvaje Alena.
Bukiety jana stvaraje sama, u jaje niama niejkaj śpiecyjalnaj fłarystyčnaj adukacyi. Kaža, što kampazicyi naradžajucca «ad serca, ad dušy». Jak tolki pastupaje novaja zamova, Alona adrazu ž nakiroŭvajecca da babul ź Minsku ci rajona. U pošukach aharodnikaŭ i dziela naładžvańnia kantaktaŭ dziaŭčynie ź jaje kamandaj pryjšłosia asabista naviedać nie adzin sielsaviet i rynak. Alona adznačaje, što kali piensijanieram da 70 hadoŭ jašče možna rastłumačyć sutnaść idei, to ludzi starejšaha ŭzrostu hladziać na heta ź niedavieram i niaredka admaŭlajucca i praciahvajuć pracavać pa zvykłaj schiemie.
Harodninu i sadavinu ŭ pastaŭščykoŭ fłarysty nabyvajuć pa toj canie, jakuju jany patrabujuć, a košt bukieta ŭ vyniku atrymoŭvajecca ad 13 da 19 rubloŭ.
«Čym my adroźnivajemsia ad kankurentaŭ? Pa-pieršaje, my dapamahajem piensijanieram, nabyvajučy pradukty ŭ ich. Pa-druhoje, my imkniomsia abaviazkova ŭklučać paŭsiul časnyk — heta naša fiška. Nu i, aproč dušeŭnaści, varta znoŭ adznačyć košt: jon u nas vielmi kankurentazdolny», — pieraličvaje plusy prajekta Alena Hałamazava.
U budučyni dziaŭčyna vielmi chacieła b, kab pačataja imi inicyjatyva ŭsio ž pierierasła ŭ dziejnaść internet-kramy, dzie kožny achvotny moh by zamović pučok zielaniny ci kiłahram siezonnych jabłyk, vyraščanych dobrymi rukami pažyłych žančyn i mužčyn, jakim siońnia, časta biespaśpiachova, davodzicca siadzieć i miorznuć sa svaim tavaram na vulicach. Pieršapačatkova — z dastaŭkaj na ofisy, a dalej budzie bačna.
«Naša Niva» — bastyjon biełaruščyny
PADTRYMAĆ
