«Kommiersant'» daviedaŭsia pra temu tajemnych telefonnych razmoŭ Pucina i Parašenki
Prezident Rasii Uładzimir Pucin rehularna stelefanoŭvajecca z kiraŭnikom Ukrainy Piatrom Parašenkam. Apošni takaja razmova adbyłasia ŭ pačatku krasavika. Baki abmiarkoŭvali situacyju na Danbasie, paviedamlaje «Kommiersant'» sa spasyłkaj na krynicy ŭ Maskvie i Kijevie.
AR
Blizkaja da Kramla krynica RBK paćvierdziła telefonnyja pieramovy pamiž dvuma prezidentami. Pa jaje słovach, takija telefonnyja pieramovy pamiž dvuma lidarami — rehularnaja praktyka.
Pa słovach surazmoŭcy «Kommiersanta» ŭ Maskvie, razmova pamiž prezidentami prachodziła ŭ «pavažlivym karektnym klučy», pry hetym palityki pieryjadyčna «pierachodzili na žartaŭliva-iraničny ton».
«Prezidenty vymušanyja byli žartavać, kab nie pasvarycca i nie nahavaryć adzin adnamu rezkaściaŭ», — rastłumačyła krynica haziety.
Jana dadała, što bakam nie ŭdałosia dasiahnuć kankretnych damoŭlenaściaŭ, adnak jany syšlisia ŭ «niekatorych humanitarnych aśpiektach». Krynica «Kommiersanta» ŭ Kijevie, blizkaja da atačeńnia Parašenki, rastłumačyła, što kiraŭniki dziaržaŭ abmiarkoŭvali abmien pałonnych, pastaŭku ŭ Danbas praduktaŭ charčavańnia, vady i elektryčnaści, a taksama vypłatu ŭkrainskich piensij žycharam «DNR» i «ŁNR».
Surazmoŭca ŭ atačeńni Parašenki skazaŭ, što kiraŭnik dziaržavy papiaredziŭ Pucina: kali respubliki nie vypłaciać daŭhi za elektraenerhiju, pastaŭki z ukrainskaj terytoryi spyniacca. 25 krasavika sapraŭdy častku terytoryi ŁNR, padkantrolnaj sieparatystam, adklučyli ad elektraenierhii.
Aficyjna pieramovy bakoŭ nie afišujucca. Kiraŭniki dziaržaŭ, nasuprać, vykarystoŭvajuć dastatkova žorstkuju rytoryku ŭ adnosinach adzin da adnaho. Z momantu anieksii Kryma i pačatku kanfliktu na paŭdniovym uschodzie Ukrainy Parašenka charaktaryzuje Rasiju jak krainu-ahresara. U kancy listapada 2016 hoda jon zajaviŭ, što rasijskaja ahresija strašniejšaja za Čarnobylskuju katastrofu. U lutym hetaha hoda jon abvinavaciŭ Maskvu i asabista Pucina ŭ nianaviści da Ukrainie i žadańni «razmalavać jaje ŭ ruskija kolery».
U toj ža čas kiraŭnik MZS Rasii Siarhiej Łaŭroŭ u siaredzinie krasavika zajaviŭ, što ŭ jaho jość «ustojlivy sumnieŭ» u adekvatnaści ŭkrainskaha kiraŭnictva.
Jašče ŭ pačatku sakavika krynicy «Kommiersanta» ŭ Maskvie i Kijevie paviedamili ab rehularnych pieramovach pamiž Pucinym i Parašenkam. Na toj momant, jak pisała hazieta, adbylisia ŭžo čatyry telefonnyja razmovy z pačatku hoda. Hutarka 21 lutaha adbyłasia pa inicyjatyvie Ukrainy i praciahvałasia kala 20 chvilin, paviedamlali krynicy vydańnia.
Tajemny farmat pieramoŭ «Kommiersant'» tłumačyŭ tym, što jany mohuć spravakavać krytyku ŭkrainskaha prezidenta «ŭ radykalnym łahiery» i pryvieści da čarhovaha abvinavačvańnia ŭ «zmovie z ahresaram za śpinaj naroda». Ciapier surazmoŭca vydańnia ŭ Kijevie taksama paćviardžaje imknieńnie nie afišavać znosiny dvuch palitykaŭ.
