Namieśnik staršyni KDB: Vajskoŭcaŭ zmohuć pryciahvać u zonu antyterarystyčnych apieracyj
Namieśnik staršyni KDB Ihar Sierhijenka padčas svajho vystupu ŭ Pałacie pradstaŭnikoŭ 19 krasavika anansavaŭ šerah źmienaŭ, jakija majuć unieści ŭ niekatoryja zakony pa pytańniach baraćby z teraryzmam.
Ihar Sierhijenka.
Tak, zakanadaŭstva płanujecca dapoŭnić terminam «krytyčna važnyja abjekty», paškodžańnie jakich moža pryvieści da surjoznych nastupstvaŭ u arhanizacyi žyćciadziejnaści nasielenych punktaŭ. Pavodle papiarednich padlikaŭ, takich abjektaŭ u Biełarusi — 865.
Taksama ŭ farmuloŭku zakona ab antyterarystyčnaj dziejnaści płanujecca ŭvieści adkaznaść za finasavańnie prajezdu da miesca navučańnia terarystyčnaj dziejnaści.
Aproč taho — trochi źmieniacca funkcyi pahraničnikaŭ, jakija zmohuć akazvać dapamohu mytnym orhanam u vyjaŭleńni niebiaśpiečnych rečyvaŭ.
Płanujecca taksama źmianić kryteryi, pa jakich arhanizacyja budzie pryznavacca terarystyčnaj, ale ŭsie hetyja kryteryi nie ahučvalisia.
Jašče ź istotnaha — źmieny ŭ zakanadaŭstvie dazvolać pryciahvać uzbrojenyja siły ŭ zonu praviadzieńnia kontrterarystyčnaj apieracyi.
Pavodle Sierhijenki, źmieny skiravanyja na papiaredžańnie teraryzmu i pryviadzieńnie zakanadaŭstva da mižnarodnych standartaŭ.
Sierhijenka paźbieh razmovy z žurnalistami paśla svajho vystupu.
