Statkievič napisaŭ list Mierkiel: Prašu pravieryć «frau A.» na detektary chłuśni
Mikałaj Statkievič apublikavaŭ u svaim fejsbuku list, jaki jon adpraviŭ kancleru Hiermanii Anhiele Mierkiel u suviazi sa źjaŭleńniem «lista frau A.», ź jakoha pačałasia sprava «Biełaha Lehijona».
«Źviartajusia da Vas z prośbaj pryniać udzieł u losie bolš čym 20 čałaviek, jakija stali zakładnikami z-za paklopnickaha danosu hramadzianki FRH», — piša Statkievič.
«Kali vieryć Alaksandru Łukašenku, niechta frau A. (sapraŭdnaje imia paklopnika nie apublikavanaje) pryjšła ŭ ambasadu Biełarusi ŭ FRH i napisała na jaho imia zajavu, dzie paznačyła, što vałodaje źviestkami ab stvareńni ŭ Respublicy Biełaruś niezakonnych uzbrojenych farmiravańniaŭ. Na padstavie hetaha danosu ŭžo na nastupny dzień pa ŭsioj krainie byli zatrymanyja dziasiatki maładych ludziej, jakija znachodzilisia ŭ patryjatyčnych kłubach abo ŭ apazicyjnych arhanizacyjach. Choć heta nie źjaŭlajecca złačynstvam navat pa biełaruskich zakonach. 21 ź ich […] znachodziacca ciapier u śledčaj turmie KDB.
Uličvajučy, što havorka idzie pra los dziasiatkaŭ biełaruskich hramadzian, a taksama členaŭ ich siemjaŭ, prašu Vas dać rasparadžeńnie orhanam pravaparadku Vašaj krainy zapytać źviestki ab hramadziancy FRH, jakaja napisała list Łukašenku. Kantaktnymi dadzienymi hetaj hramadzianki vałodajuć biełaruskija śpiecsłužby, a fotakopija jaje lista siońnia była apublikavanaja dziaržaŭnymi ŚMI. Prašu taksama pravieści dopyt hetaj «śviedki» z vykarystańniem detektara chłuśni.
Vyniki dadzienaha dopytu prašu dać biełaruskim orhanam daznańnia, a taksama apublikavać u ŚMI», — zaklikaje palityk.
«Vaša dapamoha ŭ praviadzieńni sumlennaha rasśledavańnia i vyzvaleńnia biełaruskich hramadzian, jakija niezakonna ŭtrymlivajucca ŭ zaścienkach KDB, budzie nieacennym układam u prasoŭvańnie demakratyčnych kaštoŭnaściaŭ i ŭstanaŭleńni zakonnaści i paradku na jeŭrapiejskim kantyniencie», — reziumuje Statkievič.