Stanisłaŭ Bahdankievič: «Prasić MVF nie davać Biełarusi kredyt — niapravilnaja ideja»
U internecie niejkimi ludźmi razhornuta akcyja pa zbory podpisaŭ suprać vydzialeńnia Biełarusi kredytu Mižnarodnaha valutnaha fondu.
Petycyju «Nie kredytu MVF dla Biełarusi!» padpisali ŭžo nibyta bolš za 2500 čałaviek.
U tekście zvarotu skazana: «My, nižejpadpisanyja, patrabujem spynić usie pieramovy (uklučajučy kansultacyi) pamiž MVF i kiraŭnictvam Biełarusi…
My patrabujem ad MVF nie davać finansavaj dapamohi Biełarusi, pakul ciapierašniaje kiraŭnictva zastajecca va ŭładzie».
Nakolki vytłumačalna źjaŭleńnie takoha zvarotu da MVF? Bo Mižnarodny valutny fond prosta tak hrošy nie vyłučaje - tolki pad ekanamičnyja reformy. Ci chto-niebudź dumaje, što na fonie paharšeńnia adnosin z Rasijaj MVF zojmiecca dabračynnaściu i daść u doŭh biełaruskim uładam niekalki miljardaŭ dalaraŭ, nie čakajučy praviadzieńnia reformaŭ?
Za kamientarom my źviarnulisia da doktara ekanamičnych navuk, eks-kiraŭnika Nacbanka Biełarusi Stanisłava Bahdankieviča.
- Asabista ja takija zakliki nie padtrymlivaju, - kaža Stanisłaŭ Antonavič. -
Mižnarodny valutny fond daje kredyty tolki ŭzamien na pieraŭtvareńni ŭ ekanomicy. Nie budzie prahramy ekanamičnych pieraŭtvareńniaŭ, jakija zrušać Biełaruś da prahresu, efiektyŭnaha kiravańnia ekanomikaj, rostu VUP i ŭ kančatkovym vyniku da palapšeńnia ŭzroŭniu žyćcia i dabrabytu naroda, - nie budzie hrošaj.
Tak što ŭsie hetyja zvaroty pa sutnaści ničoha nie mianiajuć, pazicyja MVF zastajecca raniejšaj.
- Biełaruś nie pieršy raz prosić hrošy ŭ MVF. U 2009 hodzie my ŭžo atrymali kredyt u 3,5 miljarda dalaraŭ, i tady, darečy, Biełaruś ŭmovy Mižnarodnaha valutnaha fondu, pad jakija vydavalisia hrošy, vykanała častkova.
- Miarkuju, što MVF razumnieje i robić vysnovy. Chutčej za ŭsio, u hety raz valutny fond nie budzie davać hrošy tolki pad abiacańni reformaŭ. Jak bačycie, da hetaha času my i nie možam damovicca. Hałoŭnaje, jak mnie zdajecca, vydzialać kredyt tranšami i paśla taho, jak buduć vykananyja ŭzhodnienyja prahramy pa pieraŭtvareńni ekanomiki.
- A čaho kankretna chočuć ad nas mižnarodnyja ekśpierty? Narodu čaściej za ŭsio kažuć pra patrabavańni pierakłaści na plečy nasielnictva apłatu ŽKH i nie pavyšać zarpłaty i piensii.
- Pierš za ŭsio MVF rekamienduje aficyjnamu Minsku refarmavać siektar dziaržpradpryjemstvaŭ, kab našy zavody nie vypuskali pradukcyju na skład, a stali kankurentazdolnymi.
Prapanujecca adklučyć ich ad dziaržprahram, i pradpryjemstvy, jakija nie zmohuć isnavać samastojna, pavinny być albo likvidavanyja, albo restrukturyzavanaja. Taksama havorka idzie i ab pryvatyzacyi dziaržpradpryjemstvaŭ i padtrymcy biespracoŭnych. Hałoŭnym pakazčykam vykananaj pracy stanie rost dadatkovaj vartaści, rost rentabielnaści pradpryjemstvaŭ. Heta ŭsio treba zakładać u prahramu i pad heta atrymlivać kredyt MVF. A atrymlivać hrošy dla padtrymańnia status-kvo, prajadać ich - taki kredyt nam nie patrebny.
Ale MVF i nie źbirajecca davać Biełarusi kredyt pad status-kvo.
Na moj pohlad, zakliki da MVF nie davać nam kredyt - niapravilnaja ideja. Ekanamičnyja reformy, jakija nam prapanuje MVF, heta pierabudova ekanomiki, jakaja paciahnie i pierabudovu ŭ palitycy.
Biednyja krainy, žabrackija narody - pahladzicie na Paŭnočnuju Kareju, Haici i h.d. - ułady nie mianiajuć. A kali raście dabrabyt, raście i kulturny ŭzrovień, adukacyjny, mianiajecca hramadzianskaja supolnaść.
- Na vaš pohlad, jakija šancy ŭ biełaruskich uładaŭ atrymać kredyt MVF?
- Jany jość. U Biełarusi dobraja kredytnaja historyja: ni razu nijakich praterminavanych zapazyčanaściaŭ pierad MVF u nas nie było, tamu admović nam ciažka. Ale
Alaksandr Łukašenka pavinien zajavić i padpisacca pad tym, što jon hatovy mianiać ekanamičnuju madel krainy. Taja madel, jakuju jon pabudavaŭ, pracavała tolki tady, kali jaje finansavała Rasija, a ciapier hetaha niama.
Ale Łukašenka pakul takich abiacańniaŭ, mabyć, nie daje. Ale mnie zdajecca, žyćcio prymusić, situacyja ŭ krainie biazvychadnaja, pryjdziecca pajści na reformy.
* * *
Kolki i kamu pavinna Biełaruś vypłacić pa daŭhach ŭ 2017 hodzie i ŭ kaho jašče prosić hrošaj?
Naša kraina ŭ 2017 hodzie pavinna vypłacić pa zamiežnaj i ŭnutranaj dziaržpazycy kala 3,5 miljarda dalaraŭ. Što tyčycca zamiežnych zapazyčanaściaŭ, to Rasii my pavinny 741,3 miljona dołaraŭ, Jeŭrazijskamu fondu stabilizacyi i raźvićcia - 487,9 miljona dołaraŭ, a taksama Kitaju - jašče 381,7 miljona. Kab raźličycca pa starych daŭhach, biełaruskija ŭłady płanavali ŭ hetym hodzie pryciahnuć 700 miljonaŭ dalaraŭ u vyhladzie tranšaŭ Jeŭrazijskaj fondu stabilizacyi i raźvićcia, a jašče 800 miljonaŭ dalaraŭ atrymać ad raźmiaščeńnia novaha vypusku jeŭraablihacyj. Adnak na dadzieny momant JEFSR nie vydzieliŭ Biełarusi jašče navat letašni tranš kredytu.
