ZŠA nanieśli rakietny ŭdar pa Siryi, Damask nie źbiŭ nivodnaj rakiety. Udary abyšli rasijskija abjekty
ZŠA vypuścili 59 kryłatych rakiet «Tamahaŭk» pa vajskovych aeradromach u centralnaj Siryi. Heta bolš kryłatych rakiet, čym Rasija ŭžyła ŭ Siryi za ŭvieś čas svajho ŭmiašańnia. Siryja nie zdoleła źbić nivodnuju rakietu. Prezident ZŠA Donald Tramp nazvaŭ hety rakietny ŭdar adpłataj za chimičnuju ataku ŭ pravincyi Idlib u aŭtorak.
Zachodnija krainy abvinavačvajuć u hetaj hazavaj atacy, achviarami jakoj stali dziasiatki mirnych žycharoŭ, režym Bašara Asada.
Jak paviedamili amierykanskija čynoŭniki, atacy karabloŭ ź Mižziemnaha mora padvierhlisia niekalki siryjskich vajskovych abjektaŭ na terytoryi avijabazy — uźlotna-pasadačnyja pałosy, samaloty i viertaloty, a taksama zapravačnyja stancyi.
Stanovišča ŭ Siryi: karta Rojterz. Zialonym abaznačany terytoryi, jakija kantralujuć Bašar Asad, rasijski i iranski ekśpiedycyjny korpus. Ružovym — siryjskija paŭstancy. Šerym — terarystyčnaja Isłamskaja dziaržava. Žoŭtym — kurdy. Aeradrom Al-Šajchat, pa jakim udaryli amierykancy, raźmieščany ŭ centry krainy. Horad Chan-Džejchun, pa jakim byŭ naniesieny ŭdar z užyćciom chimičnaj zbroi, znachodzicca ŭ pravincyi Idlib na poŭnačy.
Pavodle jaho słoŭ, rakietnyja ŭdary nie naceleny na rasijskija vajennyja abjekty ŭ Siryi.
ZŠA papiaredzili ab płanavanaj apieracyi šerah krain, u lik jakich Rasija nie ŭvachodzić, cytuje telekanał Si-en-en nienazvanaha supracoŭnika administracyi Biełaha doma.
Pavodle infarmacyi karespandenta časopisa «Tajm» u Biełym domie, da pačatku vajennaj apieracyi Donald Tramp nie telefanavaŭ Uładzimiru Pucinu.
Miž tym, jak paviedamiŭ ŚMI pradstaŭnik Pientahona, na avijabazie dysłakavałasia hrupa rasijanaŭ, ale ZŠA zahadzia papiaredzili ich ab udary.
Čytajcie taksama: Što ŭjaŭlajuć saboj amierykanskija kryłatyja rakiety «Tamahaŭk»
Siryjskaje dziaržaŭnaje telebačańnie paćvierdziła, što napadu padvierhłasia avijabaza. U zajavie siryjskaha TB havorycca pra amierykanskuju ahresiju.
Nieŭzabavie paśla pieršych paviedamleńniaŭ ab pačatku vajennaj apieracyi prezident ZŠA Donald Tramp vystupiŭ sa zvarotam da nacyi.
«Siońnia ja zaklikaju ŭsie cyvilizavanyja krainy znajści sposab pakončyć z raźnioj i krovapralićciem u Siryi», — pačaŭ svoj zvarot amierykanski prezident.
«Praduchileńnie raspaŭsiudžvańnia i vykarystańnia chimičnaj zbroi ŭjaŭlaje žyćciova važnuju cikavaść dla nacyjanalnaj biaśpieki Złučanych Štataŭ», — praciahnuŭ jon.
«Nie padlahaje sumnievu toj fakt, što Siryja vykarystała zabaronienuju chimičnuju zbroju, parušyŭšy svaje abaviazacielstvy ŭ ramkach Kanviencyi pa chimičnaj zbroi, i praihnaravała nastojlivyja patrabavańni Rady Biaśpieki AAN», — skazaŭ Tramp.
«Usie sproby ŭ papiarednija hady źmianić pavodziny Asada pravalilisia, i pravalilisia z treskam. U vyniku praciahvaje pahłyblacca kryzis ź biežancami, u rehijonie praciahvajecca destabilizacyja, jakaja pahražaje Złučanym Štatam i ich sajuźnikam», — skazaŭ jon.
Pytańnie žurnalista «Jakoje jurydyčnaje abhruntavańnie vajennych udaraŭ?» Donald Tramp pakinuŭ biez adkazu, paśla čaho pakinuŭ zału.
Tramp znachodziŭsia ŭ svaim fłarydskim majontku Mar-a-Łaha.
Namieśnik pastajannaha pradstaŭnika Rasii pry AAN zajaviŭ, što ZŠA varta «padumać pra niehatyŭnyja nastupstvy» ŭ vypadku mahčymych amierykanskich avijaŭdaraŭ pa Siryi.
«U vypadku pačatku vajennych dziejańniaŭ usia adkaznaść kładziecca na plečy tych, chto inicyjavaŭ takuju sumnieŭnuju i žudasnuju kampaniju, — zajaviŭ Uładzimir Safronkaŭ paśla zakrytaha pasiadžeńnia Rady Biaśpieki AAN pa situacyi ŭ Siryi.
Na ŭdakładniajučaje pytańnie žurnalistaŭ, jakimi mohuć być niehatyŭnyja nastupstvy, Safronkaŭ skazaŭ: «Pahladzicie na Irak, pahladzicie na Liviju».
Amierykanskija krynicy paviedamlajuć, što rakiety byli skiravanyja na tyja abjekty vajskovaj bazy, dzie nie było rasijskich daradcaŭ, prysutnych u Siryi.
Čynoŭnik Pientahona zajaviŭ, što ŭdar byŭ razavy, praciahu avijaŭdaraŭ nie płanujecca.
Udar byŭ naniesieny ŭ čas, kali Tramp pravodziŭ sustreču z kiraŭnikom Kitaja Si Czińpiniem.
