«Sakatała bočačka» — skančajecca kraŭdfandynh na vydańnie praŭdzivaj historyi našych napojaŭ. Paśpiašajciesia!
Iduć apošnija hadziny kampanii pa zbory srodkaŭ na vydańnie novaj knihi Kuchmistra Vieraščaki pra historyju aŭtentyčnych ałkaholnych napojaŭ na biełaruskich ziemlach.
Kali Vy nieabyjakavyja da historyi biełaruskich ałkaholnych napojaŭ i da historyi krainy ŭvohule, kali cikaviciesia, jak i z čaho jany rabilisia, jak užyvalisia, što značyli, z čym asacyjavalisia ŭ našych prodkaŭ, tady hetaja kniha dla Vas. Tut sabrany ŭnikalnyja źviestki, na jakija nichto raniej nie źviartaŭ pilnaj uvahi. Majučy hetuju knihu pad rukoj, vy lohka zmožacie pryhatavać samyja vytančanyja napoi pa ŭnikalnaj receptury. A kali vy ŭžo čytali «Litvinskuju kuchniu» abo «Našu Stravu», to viedajecie — aŭtar piša tak, što vodary pačynajuć kazytać vaš nos užo z samych pieršych staronak.
Čytajcie taksama:
Nie tolki pra kulinaryju: «Litvinskaja kuchnia» Alesia Biełaha
Kuchmistr Vieraščaka razburaje mify i stereatypy, jakija ŭkaranilisia ŭ našym hramadstvie vakoł kultury pićcia, i adnaŭlaje sapraŭdnuju historyju, jakaja časam čytajecca jak zachaplalny detektyŭ. Vy budziecie biaźmiežna ździŭlenyja, nakolki raznastajnym byŭ kaliści śviet našych mocnych napojaŭ, jak niečakana i cikava jon adlustroŭvajecca ŭ našaj kultury.
A aŭtar chto?
Aleś Bieły — biełaruski historyk, publicyst, kulturołah. Doktar humanitarnych navuk(PhD), historyja (2008). Viadomy błohier, psieŭdanimy — Kuchmictr Vieraščaka, Gorliwy Litwin.
Aŭtar manahrafii «Chronika Biełaj Rusi: narys historyi adnoj hieahrafičnaj nazvy», artykułaŭ pa historyi Biełarusi ŭ časopisie «Spadčyna», Encykłapiedyi historyi Biełarusi, encykłapiedyi «Vialikaje Kniastva Litoŭskaje», u šerahu anhlijskich časopisaŭ. Aŭtar scenaryjaŭ dakumientalnych filmaŭ pa historyi materyjalnaj kultury Biełarusi «Majem Rečy» (BT), «Historyja biełaruskaj straŭni» (Biełvideacentr). Aŭtar bolš čym 100 narysaŭ pa historyi biełaruskich straŭ i napojaŭ u roznych ŚMI i navukovych vydańniach, a taksama knihi Belarusian cookbook, Ńju-Jork, 2008. Łaŭreat premii biełaruskaha PEN-centra imia Franciška Bahuševiča (2001), premii Mižnarodnaha kanhresu daśledčykaŭ Biełarusi (2014). Haspadar ahrasiadziby «Marcinova Huś» (Vałožynski rajon).
Pra što kniha?
«Sakatała bočačka» — novaja kniha Alesia Biełaha (Kuchmistra Vieraščaki), zbornik zajmalnych histaryčnych narysaŭ, pryśviečanych samym znakavym ałkaholnym napojam našaj krainy, amal całkam zabytym, pakinutym u minułym. Pieršyja radki budučaj knihi byli napisanyja 18 hadoŭ nazad, u dalokim 1999 hodzie. Za hety čas daścipnyja i paznavalnyja «ałkaholna-histaryčnyja» narysy Kuchmistra Vieraščaki publikavalisia ŭ «Spadčynie», «Našaj Nivie», «Źviaździe», «Kulturie piťja», na sajcie Budzma.by.
Nazva knihi pachodzić ad biełaruskaj narodnaj pieśni, u jakoj maładuju dziaŭčynu žartaŭliva, ale vielmi liryčna paraŭnoŭvali z bočkaj piva, jakaja nudzicca ŭ piŭnicy, imknučysia «raźlicca» i zdavolić smahu taho, kamu pryznačanaja:
Sakatała bočačka,
U piŭnicy stojačy:
— Kali mianie nie vypjecie,
Ja sama raźlijusia
Pa dvare rasicaju,
Za varota krynicaju.
Havaryła dočačka
Svajoj rodnaj mamačcy:
— Kali mianie nie addaścio,
Ja ad vas sama pajdu
Pa dvary miaciołkaju,
Da miłoha pčołkaju,
Pa dvare rasicaju,
Da miłoha sinicaju.
Krupnik i starka, šampanskaje i takaj, pitny miod i roznyja naliŭki dy nastojki, pšaničnaje piva, samahon, ekzatyčny posud dla pitva — voś hałoŭnyja «hieroi» hetaj unikalnaj knihi. Zrešty, papularnyja i ekzatyčnyja napoi ŭ knizie - heta chutčej nahoda, jak u sapraŭdnaj dobraj biasiedzie. Nahoda dla hutarak pra našu historyju, litaraturu, pra vajnu i mir, siabroŭstva i kachańnie. U niečym i knihu možna paraŭnać sa znakamitaj «Maskva-Pietuški» Jerafiejeva, ale napisanaj prafiesijnym historykam materyjalnaj kultury i vyklučna na biełaruska-litoŭskim materyjale. U knizie vy znojdziecie mnostva ŭnikalnych staradaŭnich kulinarnych receptaŭ, rekanstrujavanych aŭtaram.
Pračytajcie i pierakanajciesia: «Sakatała bočačka» — samy vytančany i apjanialny šlach da razumieńnia simvałaŭ i mifaŭ našaj historyi.
Miž inšym, papiaredniaja kniha aŭtara «Litvinskaja kuchnia» — lidar prodažaŭ na partale elektronnych knih Kniharnia.by. Kali čytackija vodhuki buduć pazityŭnymi, aŭtar i vydaviectva abiacajuć praz peŭny čas vydać i jaje «papiarovy» farmat.
Heta najlepšaja prapanova!
Aŭtary spadziajucca z dapamohaj kraŭdfandynhu vyvučyć popyt i atrymać dadatkovaje finansavańnie na hety niezvyčajny knižny prajekt. Heta budzie kalarovaje vydańnie na miełavanaj papiery, z bolš čym 100 aryhinalnymi ilustracyjami. Ad kolkaści sabranaj sumy budzie zaležyć azdableńnie knihi i jaje nakład, a taksama mahčymaści rekłamy i dystrybucyi.
Kraŭdfandynh — heta cudoŭnaja mahčymaść znajści zacikaŭlenych čytačoŭ jašče pierad vychadam knihi. Dziakujučy za davier z vašaha boku, arhanizatary prapanoŭvajuć samyja nizkija košty na knihu i dadatkovyja bonusy.
Padrabiaznaści kampanii, a taksama apisańnie ŭsich bonusaŭ možacie znajści na płatformie Ulej.by.
