«Zrablu ŭsio, kab tolki nie viartacca ŭ Rasiju». Čamu źjechaŭ infarmatar Dźmitryjeŭ?
Rasijski lohkaatlet Andrej Dźmitryjeŭ, jaki niadaŭna vystupiŭ infarmataram niamieckaha žurnalista telekanała ARD Chajo Ziepielta, pakinuŭ radzimu. Pryčyna — pahrozy, jakija stali pastupać na jaho adras paśla vychadu čarhovaha filma pra dopinh u Rasii. «Sport-Ekspriess» cytuje intervju, jakoje spartoviec daŭ Sportschau.de.
«Ja nie płanavaŭ źjazdžać z krainy, kali davaŭ zhodu na intervju telekanału ARD u studzieni. Ale nie škaduju ni pra što ŭ im skazanaje. Było nieabchodna vystupić suprać dopinhavaj kultury, jakaja skłałasia ŭ Rasii. Ludzi pavinny mieć prava hołasu, inakš u našym sporcie nikoli nie adbuducca realnyja źmieny. Ale bačačy, što adbyvajecca vakoł mianie paśla vychadu filma ŭ efir, ja zrazumieŭ, što mnie lepš źjechać. Heta byŭ nieabchodny krok. Ciapier ja adčuvaju siabie ŭ biaśpiecy», — miarkuje spartsmien.
«Ja spadziavaŭsia na bolšaje. Tak, paśla majho intervju ŭ krainie ažyviłasia palemika adnosna dopinhu ŭ sporcie, ale tolki na karotki čas. Ja chacieŭ, kab inšyja atlety vystupili adkryta. Mierkavaŭ ubačyć, jak členy nacyjanalnych zbornych publična vykazvajucca suprać starych trenieraŭ i ŭsio jašče isnujučaj sistemy.
Toje, što adbyvajecca ŭ rasijskaj lohkaj atletycy — sapraŭdny žach.
Ja chacieŭ, kab inšyja spartsmieny paćvierdzili, što ja nie chłušu, i skazali, što zamiešanyja ŭ skandałach ludzi pavinny syści. Čakaŭ, što spartsmieny i treniery vystupiać u maju abaronu, ale jany zaniali niejtralnuju pazicyju, choć u pryvatnaj pierapiscy mnohija mianie padtrymali», — kaža spartoviec.
Dźmitryjeŭ taksama zaznačaje, što ź im pačali adbyvacca dziŭnyja rečy.
«Ja ni razu ŭ žyćci nie parušaŭ zakon. Nikoli nie stanaviŭsia na ŭlik u vajenkamacie. Ciapier mnie 27, ale z 18 hadoŭ da hetaha nikomu nie było spravy. Mianie nichto nie šukaŭ, ničoha ŭ takim rodzie. Jak raptam hetaja prablema paŭstała - adrazu paśla vychadu intervju na ARD. Upeŭnieny, heta nie supadzieńnie. Nieviadoma adkul jany daviedalisia, što ŭ toj momant ja žyŭ u chostele. Da mianie pryjšli biez papiaredžańnia, sprabavali siłaj zabrać pašpart i pahražali nieadkładna adpravić u turmu. Dva čałavieki trymali mianie, jak byccam ja złačyniec jaki-niebudź. Mianie prymusili padpisać papieru, što ja abaviazujusia źjavicca ŭ vajenkamat 27 lutaha. U mianie nie było vybaru. Adpravicca ŭ turmu - biessensoŭny hieraizm, nikomu nie patrebny ŭ hetaj situacyi».
