Kandrusievič: Kaścioł zakłapočany zaćvierdžanym płanam hiendarnaj roŭnaści ŭ biełaruskim hramadstvie
Zvarot arcybiskupa Tadevuša Kandrusieviča ŭ suviazi z zaćvierdžanym Savietam Ministraŭ płanam hiendarnaj roŭnaści ŭ biełaruskim hramadstvie.
«I stvaryŭ Boh čałavieka pavodle svajho vobrazu, pavodle Božaha vobrazu stvaryŭ jaho, stvaryŭ mužčynu i žančynu» (Byc 1, 27).
17 lutaha Saviet Ministraŭ Biełarusi zaćvierdziŭ Nacyjanalny płan dziejańniaŭ pa zabieśpiačeńni hiendarnaj roŭnaści ŭ našaj krainie na 2017—2020 hady.
Zaniepakojeny zachavańniem Božaha zakonu, jaki źjaŭlajecca harantam ŭ budavańni ščaślivaha žyćcia, Katalicki Kaścioł vykazvaje svaju hłybokuju zakłapočanaść patencyjalnaj mahčymaściu raspaŭsiudžvańnia hiendarnaj ideałohii ŭ biełaruskim hramadstvie.
Dziaržaŭnyja ŭłady Biełarusi šmatrazova vykazvalisia ŭ padtrymku maralnych i historyka-kulturnych kaštoŭnaściaŭ našaha naroda, u tym liku adnosna siamji, jakaja źjaŭlajecca padmurkam kožnaha hramadstva. U toj ža čas hiendernaja ideałohija maje destruktyŭny charaktar. Vialikuju niebiaśpieku vyklikaje i toje, što bolšaść ludziej nie ŭśviedamlaje, što takoje hiendarnaja ideałohija i jakija jana maje nastupstvy.
Sacyjalnyja navuki tłumačać paniaćcie «hiendar» jak svabodny (u zaležnaści ad kulturnych abstavinaŭ) vybar čałaviekam svajho połu. Heta aznačaje, što poł čałavieka vyznačacca nie jaho fizijałohijaj, a ŭpłyvam tych ci inšych kulturnych abstavinaŭ. U naš čas hety punkt hledžańnia stanovicca niebiaśpiečnaj ideałohijaj, jakaja imkliva ŭkaraniajecca ŭ žyćcio. Zamiest paniaćcia mužčyna i žančyna ŭvodziacca ažno siem paniaćciaŭ hiendarnaj prynaležnaści.
Usio heta viadzie da pahrozy źniknieńnia identyčnaści mužčyny i žančyny, da admaŭleńnia ad paniaćcia tradycyjnaj siamji, jakaja składajecca z baćki, maci i dziaciej, a taksama da lehalizacyi homasieksualnych sajuzaŭ z pravam usynaŭleńnia dziaciej i h.d.
Prychilniki hiendarnaj ideałohii imknucca da ŭviadzieńnia ŭ škołach maralna skažonaha sieksualnaha vychavańnia dziaciej, pry jakim zabaraniajecca ŭžyvańnie takich paniaćciaŭ, jak «baćka», «maci», «suženstva» i «suženskaja viernaść». U toj ža čas jany zaachvočvajuć da vykarystańnia terminaŭ «baćka A» i «baćka B», a taksama «partniorstva na peŭny čas».
Prapanujecca vučyć dziaciej tamu, što homasieksualizm ci tranśsieksualizm — heta svabodny vybar čałavieka, dokazam čaho źjaŭlajucca prykłady pieraapranańnia chłopčykaŭ u adzieńnie dziaŭčynak i naadvarot. Takija prykłady ŭžo sustrakajucca ŭ škołach niekatorych krain Zachadu.
Usio heta viadzie da antrapałahičnaj revalucyi i maralnaha rujnavańnia hramadstva z usimi nastupstvami, jakija adsiul vynikajuć, u tym liku da źmieny połu, farmiravańnia žanočych rysaŭ u chłopčykaŭ i mužčynskich — u dziaŭčynak. Prychilniki hiendarnaj ideałohii śćviardžajuć, što połam možna rasparadžacca pa ŭłasnym mierkavańni. Takim čynam jany płanujuć stvareńnie novaha čałavieka, jaki vałodaje nie adpaviednaj Božamu namieru svabodaj vybaru ŭłasnaha połu i sieksualnaj aryjentacyi.
Kaścioł nie moža zastavacca niejtralnym ci abyjakavym u tym vypadku, kali parušajecca maralnaje i naturalnaje prava, atakujecca ŭstanoŭleny Boham instytut siamji i jaje kaštoŭnaści, suženstva, maciarynstva, baćkoŭstva, maralnaść u sieksualnym žyćci i h.d. Kaścioł taksama baronić pravy žančyn i rašuča asudžaje niespraviadlivyja adnosiny da jaje ŭ siamji i hramadstvie, ale adkazam na hetuju prablemu nie moža być baraćba suprać siamji jak takoj.
Salidarnaść pamiž sužencami ŭ siamji, pamiž mužčynami i žančynami ŭ hramadstvie źjaŭlajecca abaviazkovaju dla taho, kab jany mahli plonna dziejničać na karyść usich ludziej, a padtrymka tradycyjnaj siamji, baćkoŭstva i maciarynstva nie pahražaje pravam i hodnaści žančyn.
U suviazi z vyšejskazanym źviartajusia da dziaržaŭnych uładaŭ i ŭsiaho biełaruskaha hramadstva z zaklikam nie dapuścić jaho maralnaha razłažeńnia praz uviadzieńnie ŭ štodzionnuju žyćciovuju praktyku hiendarnaj ideałohii. Zakony, jakija prymajucca ŭ krainie, pavinny słužyć zachavańniu tradycyjnaj siamji i spryjać jaje raźvićciu, bo ad hetaha budzie zaležać budučynia našaj Baćkaŭščyny. Pierafrazujučy słovy sv. Jana Paŭła II, chočacca skazać: «Biełaruś, kali žadaješ być vialikaju i mocnaju, barani siamju!».
Arcybiskup Tadevuš Kandrusievič
Mitrapalit Minska-Mahiloŭski
Minsk, 14 sakavika 2017 hoda
