Nieviadomyja brakańjery zabili nasaroha ŭ zaaparku pad Paryžam
Nieviadomyja złačyncy zabili nasaroha ŭ zaaparku horada Tuary na zachad ad Paryža, paviedamlajuć infarmahienctvy sa spasyłkaj na AFP.
Biełyja nasarohi ŭ Namibii. Fota ź Vikipiedyi
Incydent adbyŭsia ŭ noč na aŭtorak. Brakańjery pranikli na achoŭnuju i abstalavanuju kamierami videanazirańnia terytoryju i dabralisia da budynka, dzie ŭtrymlivajucca nasarohi. Paśla hetaha jany zabili adnu z žyvioł i adrezali roh, a zatym uciakli.
Achviaraj złačyncaŭ staŭ čatyrochhadovy nasaroh pa mianušcy Vins, jaki pasialiŭsia ŭ Tuary dva hady tamu. Jak adznačajuć supracoŭniki zaaparka, jon byŭ zusim maładoj asobinaj. Vins źjaviŭsia na śviet u kancy 2012 hoda ŭ zaaparku ŭ Arniemie ŭ Niderłandach i naležaŭ da padvidu paŭdniovych biełych nasarohaŭ, jakija ŭ XIX stahodździ byli praktyčna całkam źniščanyja. U ciapierašni čas u śviecie ich kala 20 tysiač, ź ich 18 tysiač — u Paŭdniovaj Afrycy. U jeŭrapiejskich zaaparkach utrymlivajecca kala 250 asobin.
Dva inšyja biełyja nasarohi — 37-hadovaja Hrejs i piacihadovy Bruna, jaki prybyŭ u Tuary razam ź Vinsam, nie paciarpieli.
Francuzskija ŭłady miarkujuć, što zamoŭcami brakańjeraŭ mahli być nieviadomyja asoby z Azii ci Afryki, dzie rohi nasarohaŭ vysoka ceniacca ŭ tradycyjnaj miedycynie abo rytuałach. Košt adnaho roha na čornym rynku moža dasiahać 40-50 tysiač dalaraŭ.
navierchv zakładki
