Sasłužyŭcy Hivi ŭziali na siabie adkaznaść za jaho zabojstva?
Adkaznaść za zabojstva kamandzira prarasijskich sieparatystaŭ Michaiła Tałstych (Hivi) uziali na siabie bajcy z bataljona «Samali», jakija vajavali ŭ Danbasie pad jaho kiraŭnictvam. Heta śćviardžaje rasijskaja «Novaja hazieta».
«Francuz» — u akularach z sasłužyŭcami. Fota: Ukantakcie
U redakcyju haziety źviarnuŭsia čałaviek, jaki pradstaviŭsia hramadzianinam RF Iharam Mylcavym z pazyŭnym «Francuz». Jon raspavioŭ, što razam z tryma sasłužyŭcami spłanavaŭ i ažyćciaviŭ zabojstva Hivi ŭ adpłatu za zdradu padčas bajoŭ pad Aŭdziejeŭkaj u studzieni 2017 hoda.
Pa śćviardžeńni Mylcava, padčas bajoŭ Tałstych, bajučysia za svajo žyćcio, upotaj streliŭ sabie ŭ nahu. Kali jaho pavieźli z pola boju, jon nibyta zahadaŭ adkryć ahoń pa svaich.
«Prosta tak syści jon nie moh, heta deziercirstva, pazicyju kinuć jon nie moh nijak, heta zahad Zachara [kiraŭnika samaabvieščanaj DNR Alaksandra Zacharčanki] stajać da kanca! Jaho paciahnuli miedyki, a praz paŭtary hadziny nas nakryła svaja ž artyleryja», — raspavioŭ Mylcaŭ.
Padrabiaznaściaŭ padrychtoŭki zamachu Mylcaŭ nie raspavioŭ. Pa jaho słovach, ciapier jon znachodzicca ŭ vakolicach Daniecka.
«Ja ŭ vyšuku i paranieny trochi, jašče try čałavieki syšli ŭ padpolle. Zacharu ciapier jość, za što pieražyvać», — cytuje jaho «Novaja hazieta».
