Miniust prapanoŭvaje ŭvieści kvoty na zakanadaŭčyja akty prezidenta
Ministerstva justycyi prapanoŭvaje prapracavać pytańnie ab dyrektyŭnym abmiežavańni kolkaści prajektaŭ zakanadaŭčych aktaŭ prezidenta albo ab uviadzieńni svajho rodu kvatavańnia aktaŭ prezidenta, jakija inicyjatyŭna rychtujucca dziaržorhanami. Pra heta havaryłasia 3 lutaha na pasiadžeńni kalehii Miniusta pa vynikach pracy sistemy ministerstva i zadačach na 2017 hod, paviedamlaje Nacyjanalny centr pravavoj infarmacyi na partale pravo.by.
U minułym hodzie ŭ ramkach narmatvorčaj dziejnaści Ministerstvam justycyi razhledžana 7.643 dakumienty (dla paraŭnańnia: u 2015 hodzie — 7.884), ź ich kala 3 tys. prajektaŭ narmatyŭnych pravavych aktaŭ.
Jakaść prajektaŭ, jakija raspracoŭvajucca dziaržaŭnymi orhanami, pa-raniejšamu zastajecca nizkaj — 41% prajektaŭ, jakija pastupajuć u ministerstva, uzhadniajecca z zaŭvahami (biez uliku prajektaŭ, jakija dapracoŭvajucca z udziełam śpiecyjalistaŭ Miniusta), prainfarmavaŭ pieršy namieśnik ministra justycyi Siarhiej Zadziran.
Jon pradstaviŭ udzielnikam kalehii top-10 niedachopaŭ, jakija nie dazvalajuć zabiaśpiečyć jakasny praryŭ u śfiery narmatvorčaści. Naprykład, u śpis uvajšła šyrokaja praktyka padrychtoŭki prajektaŭ aktaŭ prezidenta dla ŭrehulavańnia adnosin u samych roznych śfierach hramadskaha žyćcia, a časam i ŭ jakaści miechanizmu ŭzhadnieńnia z prezidentam taho ci inšaha varyjantu dziejańniaŭ, jaki znachodzicca ŭ vyklučnaj śfiery adkaznaści kankretnaha kiraŭnika. «Takaja praktyka patrabuje vykaranieńnia, — pierakanany Zadziran. — Najaŭnaść niekalkich zakanadaŭčych aktaŭ pa adnych i tych ža pytańniach vyklikaje pravavuju niavyznačanaść, parušaje pryncyp stabilnaści i sistemnaści zakanadaŭstva».
Taksama, pavodle źviestak Miniusta, prablemaj stała vialikaja kolkaść adsyłačnych normaŭ u zakonaprajektach, jakaja viadzie da pryniaćcia vialikaj kolkaści padzakonnych aktaŭ. Narakańni vyklikaje vykarystańnie ŭ prajektach narmatyŭnych pravavych aktaŭ nie adnastajnaj terminałohii, składanych pravavych kanstrukcyj, jakija robiać zakanadaŭstva niezrazumiełym dla ludziej bieź śpiecyjalnaj padrychtoŭki.
Nie źmianšajecca kolkaść prajektaŭ narmatyŭnych pravavych aktaŭ, jakija viartajucca orhanu-raspracoŭščyku z pryčyny parušeńnia rehłamientu ŭrada: pradstaŭlajucca prajekty, jakija nie padlahajuć uzhadnieńniu ź Miniustam, albo prajekty, jakija nie ŭzhodnienyja z usimi zacikaŭlenymi i biez patrebnych dakumientaŭ. Uźnikajuć prablemy i ŭ pracesie ŭzhadnieńnia ź inšymi narmatvorčymi orhanami, praviadzieńnia ekśpiertyzy prajektaŭ narmatyŭnych pravavych aktaŭ.
«Časta raspracoŭščyki prosiać adpracavać i likvidavać zaŭvahi ŭ rabočym paradku. Takaja pabudova pracy abhruntavanaja, kali zaŭvahi nie nosiać kanceptualnaha charaktaru. Adnak časta raspracoŭščyk ličyć dapuščalnym pradstaŭlać prajekt u syrym, nieprapracavanym vyhladzie, ličačy, što jaho dapracoŭka pry ŭdziele śpiecyjalistaŭ Ministerstva justycyi — niešta samo saboj zrazumiełaje», — pryvodzić Nacyjanalny centr pravavoj infarmacyi słovy pieršaha namieśnika ministra.
Jon adznačyŭ, što dachodzić da taho, što raspracoŭščyk nie maje ŭjaŭleńnia ab metach, sensie, miechanizmach realizacyi prapanavanych padychodaŭ, nie moža abhruntavać i patłumačyć pryčyny, pa jakich abrany mienavita prapanavany vyhlad narmatyŭnaha akta, nie kažučy ŭžo pra analiz mahčymych nastupstvaŭ pryniaćcia takoha dakumienta.
