Były hramadzianin Biełarusi z «Azova» nabyŭ kvatery ŭ Kijevie i samalot, a taksama zarabiŭ $1 miljon
Pavodle padatkovaj dekłaracyi za 2015 hod, Siarhiej Karatkich maje paŭtary kvatery, samalot i pazyčaje znajomym pa paŭmiljona dalaraŭ.
Siarhiej Maluta Karatkich — čałaviek z bahataj i sumnieŭnaj bijahrafijaj. Ultrapravy aktyvist, siabar rasiejskaha nieanacysta Ciesaka, jon urešcie vajavaŭ va Ukrainie ŭ bataljonie «Azoŭ», byŭ vyviednikam z pazyŭnym «Bocman».
U 2014 hodzie Karatkich atrymaŭ ukrainskaje hramadzianstva z ruk Piatra Parašenki.
Ukrainskaje hramadzianstva Karatkich atrymaŭ 5 śniežnia 2014 hoda. Fota — depo.ua
Letaś Maluta ŭznačaliŭ adździeł achovy abjektaŭ stratehičnaha pryznačeńnia palicyi Ukrainy. Adpaviedna, musiŭ padać dekłaracyju za 2015 hod. Źviestki ŭ dekłaracyi akazalisia niečakanyja.
Aficyjny zarobak Siarhieja Karatkich składaŭ 6,5 tysiačy hryŭniaŭ štomiesiac ($237 pa ciapierašnim kursie).
Adnak žyŭ jon vidavočna nie pa srodkach.
U 2015 hodzie Maluta spačatku nabyŭ pałovu kvatery płoščaj kala 75 kvadratnych mietraŭ u pryharadzie Kijeva. Žyllo kaštavała prykładna $16 tysiač.
Paśla była jašče adna kvatera, płoščaj 69 mietraŭ. Hetaja nieruchomaść kaštavała kala $50 tysiač.
Taksama ŭ mai 2015 hoda Karatkich paradavaŭ siabie ŭłasnym samalotam. Jon nabyŭ remkamplekt Ł-39 «Albatros» 1982 hoda vypusku — heta vučebna-bajavy nievialiki samalot, češskaj vytvorčaści. «Maluta» zapłaciŭ za jaho kala $1,2 tysiačy.
Ł-39 «Albatros». Fota — aviabvvaul.narod.ru
Ale i heta nie ŭsio. Zhodna z dekłaracyjaj, Siarhiej Karatkich zachoŭvaje $223 tysiač, 135 tysiač jeŭra i 500 tysiač hryŭniaŭ, a jašče 565 tysiač jeŭra jon pazyčyŭ treciaj asobie. Ahułam atrymlivajecca kala $1 miljona.
Taksama ŭ Karatkich jość hadzińnik nieviadomaj marki za $5 tysiač i kaštoŭnaja aŭtaručka Montegrappa za $4,3 tysiač. Jana prachodzić u dekłaracyi jak «juvielirny vyrab».
Siarhiej Maluta Karotkich naradziŭsia ŭ Taljaci ŭ 1974 hodzie, ale potym pierajechaŭ razam z baćkami ŭ Biełaruś. Z 1992 pa 1994 słužyŭ u biełaruskaj armii, atrymaŭ śpiecyjalnaść śpiecyjalista techničnych srodkaŭ vyviedki. Słužyŭ jon u vyviedvalnym bataljonie. Paśla słužby ŭ vojsku pastupiŭ u škołu KDB. Advučyŭsia tam 2 hady, ale vylecieŭ z vučoby z-za svaich suviaziaŭ z radykalnymi hrupoŭkami.
Karatkich byŭ viadomy i jak adzin ź lidaraŭ Nacyjanał-sacyjalistyčnaha tavarystva (NSO) — adnaho z najbujniejšych ultrapravych abjadnańniaŭ u Rasii.
Taksama Karatkich — stryječny brat śpiecnazaŭca Valeryja Ihnatoviča, asudžanaha na pažyćciovy termin za vykradańnie apieratara ORT Dźmitryja Zavadskaha.
Akramia taho, Malutu abvinavačvajuć va ŭdziele ŭ źbićci biełaruskich apazicyjanieraŭ u 1999 hodzie, a potym — u 2013 hodzie — u kryvavym kanflikcie ź biełaruskimi antyfašystami. U raniejšyja časy niekatoryja abvinavačvali jaho i ŭ suviaziach sa śpiecsłužbami.
