Ministr ekanomiki raskazaŭ, jakija niezaležnyja ŚMI čytaje
Ministr ekanomiki Uładzimir Zinoŭski daŭ intervju «Savieckaj Biełarusii», u jakim raskazaŭ, adkul atrymlivaje infarmacyju.
— Napeŭna vaš pracoŭny dzień pačynajecca z navin. Jakija krynicy infarmacyi vybirajecie? Tradycyjnyja ŚMI, internet?
— Čaściej za ŭsio moj pracoŭny dzień pačynajecca adnolkava, možna navat skazać, što jość peŭnaja tradycyja. I ranišnija naviny — jaje paŭnavartasnaja častka. Z krynic infarmacyi mnie najbolš blizkija haziety. Heta strojny paradak zahałoŭkaŭ, tekstaŭ, pustych prastor, fatahrafij i ilustracyj, jon lepš dapamahaje zasiarodzicca, nie adciahvaje ŭvahu. Hazietu možna ŭziać u ruki, prahortvać napierad i nazad. Heta nievialikaja pryhoda. Ź dziaržaŭnych drukavanych ŚMI čytaju «Savieckuju Biełarusiju», «Respubliku», «Narodnuju hazietu», ź niedziaržaŭnych — «Ekanamičnuju hazietu», «Kamsamolskuju praŭdu» i «Narodnuju volu». Taksama starajusia nie vypuskać ź vidu naviny ŭ internecie: śviežy ahlad klučavych padziej u krainie i ŭ śviecie i publikacyj, dzie zhadvajecca Minekanomiki, za minułyja sutki kožnuju ranicu traplaje da mianie na stoł.
U čas razmovy Uładzimir Zinoŭski častuje nas miakkimi imbirnymi cukierkami z Kitaja. A na pytańnie, što čaściej za ŭsio pryvozić svaim zamiežnym kaleham ź Biełarusi, pieraličvaje: lon, cukierki, miod. Darečy, miod naš vielmi lubiać i prosiać pastaŭlać jaho na ekspart. Na dumku ministra, ahraryjam varta było pra heta zadumacca.
— Jak pravodzicie vychadny dzień? Jakija zaniatki dapamahajuć rassłabicca?
— Vy, napeŭna, zdahadvajeciesia, što značnuju častku vychodnych dzion, jak minimum suboty, ja pravodžu na pracy. Heta abjektyŭnaja realnaść i narmalnaja praktyka dla dziaržaŭnaha kiraŭnika. A kali dzień sapraŭdy vychadny, ja pravodžu jaho ź siamjoj i ŭžo šeść hadoŭ zajmajusia budaŭnictvam doma (dom, pra jaki zhadvaje Zinoŭski, — adzin z tych, što čynoŭniki budujuć u «Drazdach-2» — zaŭvaha «NN»). Na rybałku ci palavańnie nie chadžu. Lublu hryby źbirać, ale, sami razumiejecie, u lesie byvaju vielmi redka.
* * *
Uładzimir Zinoŭski
Nar. u 1955 u Jalizavie Asipovickaha rajona. Skončyŭ Biełaruski dziaržaŭny instytut narodnaj haspadarki (1978) i Akademiju kiravańnia (1993). Pracavaŭ u Centralnym statystyčnym upraŭleńni BSSR (1981—1986), statystyčnym upraŭleńni Minskaj vobłaści (1986—1989), aparacie Savieta ministraŭ (1989—1992). Pieršy namieśnik ministra statystyki i analizu (1992—1998), ministr statystyki i analizu, staršynia Biełstata (1998—2014). Ministr ekanomiki (z 2014).
