Sašuryn pra Domračavu: Nie razumieju, jak maci moža pakinuć takoje maleńkaje dzicia na vychavańnie inšym
Viadomy biełaruski bijatłanist Vadzim Sašuryn padzialiŭsia mierkavańniem ab tym, što biełaruskaja bijatłanistka Darja Domračava vyrašyła viarnucca ŭ hetym siezonie ŭ sport paśla niadaŭniaha naradžeńnia dački.
«Darja nie pieršaja spartsmienka, jakaja nie žadaje doŭhi čas siadzieć u dekrecie. Tym bolš što jana lidar nie tolki biełaruskaha, ale i suśvietnaha sportu. I biez Domračavaj našaj kamandzie pryjdziecca vielmi składana. Ja joj ad usioj dušy zyču novych pośpiechaŭ u sporcie, ale, ščyra kažučy, pa-čałaviečy nie razumieju, jak maci moža pakinuć takoje maleńkaje dzicia na vychavańnie inšym dziela taho, kab znoŭ biehać i stralać. Ja sam u minułym prafiesijny bijatłanist i viedaju, kolki treniroŭki i spabornictvy patrabujuć času. I ja baćka traich dziaciej, tamu viedaju i pra toje, jakoj uvahi patrabujuć dzieci ad baćkoŭ.
U mianie na šlachu sport/dzieci pieravažyli apošnija, kali žonka druhi raz naradziła. Liču, što dla žančyny na pieršym miescy pavinna być siamja. Mnie, naprykład, padabajecca niamieckaja bijatłanistka Mahdalena Nojer. Pryjšła ŭ bijatłon, stała supierzorkaj i ŭ promniach słavy pryhoža raźvitałasia sa sportam, kab zajmacca dziećmi i siamiejnymi spravami.
Tut treba razumieć, što sport — nie ŭsio naša žyćcio. Sa svajho dośviedu viedaju, što hałoŭnaje pačynajecca paśla sychodu sa sportu, choć, biezumoŭna, kali ŭ ciabie niešta dobra atrymlivajecca, to treba łavić momant. Zrešty, nikoha vučyć nie źbirajusia, u kožnaha svaja hałava na plačach. A Darji, biezumoŭna, pośpiechaŭ!» — cytuje Sašuryna «Narodnaja vola».
Nahadajem, Domračava stała mamaj 1 kastryčnika.
