Patryjarch Kirył: RPC nikoli nie dapuścić adździaleńnia Ukrainskaj carkvy
Ruskaja pravasłaŭnaja carkva (RPC) nikoli nie pahodzicca na niezaležnaść Ukrainskaj carkvy ad Maskoŭskaha patryjarchatu, zajaviŭ patryjarch Maskoŭski i ŭsiaje Rusi Kirył. Pra heta piša VVS.
Getty
«Naša Carkva nikoli nie pakinie ŭ biadzie svaich bratoŭ na Ukrainie i nie admovicca ad ich. My nikoli nie pahodzimsia na źmianieńnie śviatych kananičnych miežaŭ našaj Carkvy, bo Kijeŭ — heta duchoŭnaja kałyska śviatoj Rusi, jak Mcchieta dla Hruzii ci Kosava dla Sierbii», - - skazaŭ patryjarch Kirył u chramie Chrysta Zbaviciela na ŭračystym mierapryjemstvie z nahody svajho 70-hodździa.
Jak skazaŭ patryjarch, siońnia Ukrainskuju carkvu sprabujuć «uciahnuć u hłyboki kanflikt, jaki padzialaje hramadstva, i zrabić jaje zakładnicaj hetaha kanfliktu».
«Adbyvajucca hvałtoŭnyja zachopy chramaŭ, ihnarujucca rašeńni sudoŭ, viadziecca infarmacyjnaja kampanija suprać Carkvy, va ŭkrainskim parłamiencie prapanujucca zakonaprajekty, meta jakich — dyskryminavać i pastavić u najciažejšyja ŭmovy najbujniejšuju relihijnuju supołku krainy», — skazaŭ pradstajaciel RPC.
Va Ukrainie ciapier dziejničajuć try pravasłaŭnyja relihijnyja arhanizacyi: Ukrainskaja pravasłaŭnaja carkva Maskoŭskaha patryjarchatu i niepryznanyja RPC — Kijeŭski patryjarchat (stvorany ŭ 1990-ja hady) i Ukrainskaja aŭtakiefalnaja pravasłaŭnaja carkva (stvoranaja ŭ 1917 hodzie).
Prezident Ukrainy Piatro Parašenka nieadnarazova vystupaŭ za stvareńnie ŭ krainie pamiesnaj Pravasłaŭnaj carkvy. Adna z metaŭ hetaj inicyjatyvy — całkam adździalić Ukrainskuju pravasłaŭnuju carkvu ad Maskoŭskaha patryjarchatu.
U červieni Viarchoŭnaja Rada zaćvierdziła histaryčny zvarot da Usialenskaha patryjarcha z prośbaj nadać ukrainskaj pravasłaŭnaj carkvie aŭtakiefaliju, što stała b krokam da budučaha pryznańnia kananičnaści UPC Kijeŭskaha patryjarchatu.
