Parłamient Vieniesueły zapuściŭ praceduru impičmientu Madury
Nacyjanalnaja asambleja Vieniesueły, što kantralujecca apazicyjaj, uchvaliła pačatak pracesu impičmientu prezidenta Nikałasa Madury, pieradaje Reuters.
AFP
Hałasavańnie adbyłosia na pasiadžeńni ŭ aŭtorak, 25 kastryčnika. Členy parłamienta taksama prahałasavali za vyklik Madury na pasiadžeńnie kanhresa na nastupnym tydni, 1 listapada, piša rbc.ru.
U minułuju piatnicu, 21 kastryčnika, u Vieniesuele byŭ zabłakavany refierendum ab adchileńni Madury ad ułady z-za pretenzij da podpisaŭ - vybarčaja kamisija admoviłasia rehistravać podpisy ŭ padtrymku jaho praviadzieńnia, bo sudy pryznali častku podpisaŭ padroblenymi, paśla čaho parłamient krainy abviaściŭ pra pačatak adchileńnia Madura šlacham impičmientu.
U niadzielu, 23 kastryčnika, Nacyjanalnaja asambleja sabrałasia na pazačarhovuju siesiju i pryniała zajavu, u jakoj abvinavaciła prezidenta va ŭzurpacyi ŭłady, zaklikaŭšy armiju nie padparadkoŭvacca jamu. «Urad ažyćciaviŭ dziaržaŭny pieravarot, jon maje namier skraści hałasy vieniesuelcaŭ», - zajaviŭ tady apazicyjny deputat Chulia Borchies.
Praciŭniki Madury pieramahli na parłamienckich vybarach u śniežni 2015 hoda i zajmajuć u asamblei dźvie traciny miescaŭ.
Na sieradu, 26 kastryčnika, apazicyja zapłanavała maštabnyja akcyi pratestu. U hety dzień pavinien byŭ pačacca čarhovy raŭnd zboru podpisaŭ u padtrymku refierendumu ab adchileńni prezidenta.
Paŭnamoctvy Madury minajuć u 2019 hodzie. Kali refierendum ab adchileńni nie adbudziecca ŭ hetym hodzie, to ŭ vypadku impičmientu nie buduć prachodzić vybary - da 2019 hoda va ŭładzie zastaniecca vice-prezident Arystabuła Istur, prychilnik Madury. Kali Madura prajhraje refierendum da 10 studzienia 2017 hoda, to ŭ Vieniesuele projduć pazačarhovyja prezidenckija vybary.
