Łukašenka prapanavaŭ aptymizavać terminy navučańnia ŭ VNU, vykinuŭšy ŭsio lišniaje
Adbor abituryjentaŭ u vyšejšyja navučalnyja ŭstanovy nieabchodna ŭdaskanalić, a navučańnie zrabić bolš praktyka-aryjentavanym. Ab hetym Alaksandr Łukašenka zajaviŭ, dajučy zhodu na pryznačeńnie novych rektaraŭ vyšejšych navučalnych ustanoŭ.
Kiraŭnik dziaržavy źviarnuŭ uvahu, što sistema vyšejšaj adukacyi maje patrebu ŭ aptymizacyi. «Nam treba aptymizavać terminy navučańnia, prybrać z prahram ŭsio lišniaje. Davajcie pakiniem tyja kursy, jakija siońnia patrebnyja dla kankretnaha śpiecyjalista», — skazaŭ Alaksandr Łukašenka.
Jon pryvioŭ u prykład navučańnie na miedycynskich śpiecyjalnaściach.
Pavodle jaho słoŭ, budučy doktar u pieršuju čarhu pavinien vyvučać tyja pradmiety, jakija spatrebiacca ŭ prafiesijnaj dziejnaści, a taksama atrymlivać viedy pa sumiežnych navukach. «Viadoma, jak hramadzianin jon pavinien viedać historyju svajoj krainy. Ale jon vyvučyŭ jaje ŭ škole.
Šlifanicie va ŭniviersitecie na pieršym kursie adzin siemiestr, ale navošta bolš? Bo niekatoryja pradmiety zdajuć dziela zaliku abo acenki. Farmalizmu być nie pavinna», — padkreśliŭ kiraŭnik dziaržavy.
Pry hetym, źviarnuŭ uvahu Alaksandr Łukašenka, navučańnie pavinna być bolš praktyka-aryjentavanym. «Treba adrazu akunuć studenta, byłoha abituryjenta, u jaho budučuju prafiesiju. Niachaj jon, kali zrazumieje, što nie tudy trapiŭ, lepš sydzie ŭ pieršym siemiestry, čym praz dva-try hady, — miarkuje kiraŭnik krainy. — Potym jon atrymaje adukacyju, a pracavać niama kamu».
Kiraŭnik dziaržavy dadaŭ, što vostra staić pytańnie ab nieabchodnaści udaskanalić sistemu adboru ŭ VNU. «Mnie zdajecca, što my tut niešta niedapracavali. My prajšli peŭny šlach i ŭbačyli: tak, testy — heta dobra. Ale jość šmat niedachopaŭ», - adznačyŭ Alaksandr Łukašenka.
Kiraŭnik krainy rastłumačyŭ, što staršakłaśnikaŭ pry padrychtoŭcy da pastupleńnia navučajuć tolki rašać testy i zavučvać patrebnuju infarmacyju.
«U samim pracesie testavańnia my nie bačym čałavieka. Pahladzicie, kolki ŭ škołach talenavitych chłopčykaŭ i dziaŭčynak. Potym jany stanoviacca mocnymi kiraŭnikami, navukoŭcami … Ale vykładčyk bačyć patencyjał hetaha čałavieka, kali hutaryć ź im, — skazaŭ kiraŭnik dziaržavy.
- Testavańnie — heta dobraja reč. Ale my nie bačym čałavieka, i tut treba niešta pradprymać. što treba rabić, my za zimu pavinny padumać».
Akramia taho, pavodle słoŭ Alaksandra Łukašenki, adbor u VNU pasrodkam centralizavanaha testavańnia niehatyŭna adbivajecca na prafaryjentacyi navučencaŭ.
«Nie prajšoŭ u adnu VNU, pastupiŭ u inšuju, dzie mienšy konkurs, — zaŭvažyŭ kiraŭnik krainy.
— Što takoje prafaryjentacyja ŭ takim vypadku? My ž zahadzia aryjentujem čałavieka być jurystam, ekanamistam, čyhunačnikam, vajskoŭcam. A jon tut pahladzieŭ — adukacyju aby atrymać — i pajšoŭ kudyści. i što? Zajmajecca i viedaje, što inžynieram pracavać nie budzie».
Kiraŭnik dziaržavy nahadaŭ, što ŭ raniejšyja časy abituryjenty metanakiravana išli na vybranuju śpiecyjalnaść. Pry hetym jany mahli pastupać niekalki razoŭ zapar, pakul nie buduć zaličany ŭ VNU.
«Nam treba pahladzieć na adbor pa tych ci inšych śpiecyjalnaściach, u tyja ci inšyja VNU», - reziumavaŭ Alaksandr Łukašenka.
Siońnia Łukašenka ŭzhadniŭ pryznačeńnie Juryja Kułažanki na pasadu rektara Biełaruskaha dziaržaŭnaha univiersiteta transpartu i Ivana Palavody na pasadu načalnika Univiersiteta hramadzianskaj abarony MNS.
