Biełaruskim vypusknikam zamiežnych VNU buduć dapamahać pracaŭładkavacca na radzimie
Ab prablemie pracaŭładkavańnia biełaruskich vypusknikoŭ zamiežnych univiersitetaŭ na radzimie zajaviła daktarantka Univiersiteta Viktoryi ŭ Kanadzie Taćciana Šaban na pres-kanfierencyi ŭ Minsku 20 kastryčnika. Pavodle jaje słoŭ, jana biespaśpiachova sprabavała znajści pracu ŭ Minsku paśla zakančeńnia mahistratury pa mižnarodnych adnosinach u Notynhiemskim univiersitecie (Vialikabrytanija).
«Ja b chacieła paśla zakančeńnia daktarantury viarnucca ŭ Minsk, bo tut maja dačka i baćki. Adnak ja bajusia, što niaŭdały vopyt pošuku pracy paŭtorycca», — skazała Šaban.
Staršynia Minskaha staličnaha sajuza pradprymalnikaŭ i rabotadaŭcaŭ Uładzimir Karahin adznačyŭ, što vučoba za miažoj — plus dla śpiecyjalista. «Tyja, chto atrymaŭ adukacyju za miažoj, — skazaŭ jon, — paśla viartańnia ŭ Biełaruś prynosiać vopyt dziełavoj kultury, viedańnie infrastruktury, vopyt adukacyjnych sistem roznych krain i mohuć spryjać intehracyi ekanomiki Biełarusi ŭ mižnarodnuju ekanamičnuju prastoru. Heta važna z ulikam epochi hłabalizacyi».
Važna, kab biełaruskija vypuskniki zamiežnych VNU nie zhubilisia paśla viartańnia, viedali, što ich viedy buduć zapatrabavanyja na radzimie, zajaviŭ Karahin.
Sproba abjadnać biełarusaŭ — vypusknikoŭ zamiežnych univiersitetaŭ robicca ŭ ramkach prajekta «Tvajo zaŭtra». Kiraŭnik prajekta Ina Kulej paviedamiła, što ciapier u stadyi rehistracyi znachodzicca ahienctva z adnajmiennaj nazvaj.
Ahienctva płanuje aktyŭna dapamahać intehracyi ludziej, jakija atrymali adukacyju za miažoj i jakija viarnulisia ŭ Biełaruś. Jašče adna zadača — ustalavańnie navukovych, ekśpiertnych i kulturnych suviaziaŭ pamiž biełaruskaj akademičnaj dyjasparaj i histaryčnaj radzimaj.
«My chočam stvaryć supolnaść ludziej, jakija atrymali adukacyju za miažoj i chočuć žyć u Biełarusi. My adyšli ad kancepcyi «ŭciečka-viartańnie rozumaŭ» i vitajem sučasnuju kancepcyju «cyrkulacyja rozumaŭ». Fakt mižnarodnaj mabilnaści biełarusaŭ — heta składnik akademičnaj mabilnaści, jakaja źjaŭlajecca adnym z pryncypaŭ Bałonskaha pracesu. My ličym biełaruskich studentaŭ, aśpirantaŭ i stažoraŭ, jakija vučacca ŭ zamiežnych univiersitetach, šmattysiačnym patencyjnym navukova-techničnym, kulturnym i hramadskim reziervam dla našaj krainy», — skazała Kulej.
Jana taksama paviedamiła, što «Tvajo zaŭtra» zaprašaje 21 kastryčnika ŭ 18 hadzin u zału Mižnarodnaha centra imia Jochaniesa Rau (Minsk, pr. Haziety «Pravda») na «Kastryčnicki kirmaš». Uvachod pa papiaredniaj rehistracyi. Heta pieršaje ŭ krainie mierapryjemstva, na jakim zacikaŭlenyja pradstaŭniki dziaržaŭnych instytutaŭ, dypłamatyčnaha korpusa, biźniesu, hramadskaha siektara i ŚMI zmohuć paznajomicca z aktyŭnymi ludźmi, jakija atrymali adukacyju za miažoj.
