Premjer-ministr Brytanii maje namier zrabić pieršy krok na šlachu vyvadu krainy ź ES
Premjer-ministr Vialikabrytanii Tereza Mej maje namier zrabić pieršy krok na šlachu vychadu krainy ź ES, paviedamlaje Financial Times. Havorka idzie ab «vialikim zakonie admieny», jak vykazałasia Mej u intervju Sunday Times, jaki «znoŭ zrobić Vialikabrytaniju suvierennaj i niezaležnaj dziaržavaj».
Foto: Frank Augstein/AP
Havorka idzie pra admienu Akta ab jeŭrapiejskich supolnaściach 1972 hoda, jaki ŭvioŭ u dziejańnie zakanadaŭstva Jeŭrapiejskaha sajuza na terytoryi Vialikabrytanii.
Čakajecca, što brytanski premjer abvieścić ab uviadzieńni zakona, jaki admianiaje Akt, na štohadovaj kanfierencyi Kansiervatyŭnaj partyi ŭ Birminhiemie ŭ niadzielu. Infarmacyja ab admienie hetaha Akta taksama budzie ŭklučana ŭ štohadovuju pramovu karalevy.
«Ułada zakonaŭ ES u Vialikabrytanii skončycca», — dadała jana.
U červieni hetaha hoda ŭ Vialikabrytanii prajšoŭ refierendum ab vychadzie krainy ź Jeŭrapiejskaha sajuza. Za toje, kab kraina pakinuła ES, vykazałasia bolšaść — 51,9% žycharoŭ.
Na pačatku vieraśnia Mej zajaviła, što Brytanija pavinna być hatovaja da «ciažkich časoŭ» u suviazi z Brexit. Pry hetym jana vykazała ŭpeŭnienaść, što kraina «nabudzie vyhadu» ad vychadu ź ES.
