Z Paŭła Vinahradava źniaty previentyŭny nahlad
Sud Maskoŭskaha rajona Minska 13 vieraśnia źniaŭ z aktyvista apazicyi Paŭła Vinahradava previentyŭny nahlad, jaki byŭ ustalavany nad im 7 červienia 2016 hoda. Jak paviedamlaje pravaabarončy sajt spring96.org, previentyŭny nahlad źniaty z pryčyny skančeńnia terminu sudzimaści, jaki minaje 14 vieraśnia.
Nahadajem, paśla padziej na płoščy Niezaležnaści 19 śniežnia 2010 hoda Vinahradaŭ byŭ aryštavany i asudžany na čatyry hady pazbaŭleńnia voli. 14 vieraśnia 2011 hoda maładziožny aktyvist vyjšaŭ na svabodu zhodna z ukazam prezidenta ab pamiłavańni, ale za im ustalavali previentyŭny nahlad na try z pałovaj hady. Zatym previentyŭny nahlad byŭ praciahnuty jašče na paŭhady ŭ suviazi ź nieadnarazovym pryciahnieńniem jaho da administracyjnaj adkaznaści.
Previentyŭny nahlad ź Vinahradava byŭ źniaty 2 listapada 2015 hoda, paśla čaho aktyvist byŭ pastaŭleny na ŭlik u Maskoŭskim RUUS. Adnak 7 červienia 2016 hoda znoŭ było pryniataje rašeńnie ab ustalavańni previentyŭnaha nahladu ŭ dačynieńni da jaho. Miera była pryniata ŭ suviazi z najaŭnaściu niekalkich administracyjnych pratakołaŭ, składzienych za ŭdzieł aktyvista ŭ vuličnych akcyjach.
«Navat u takoj krainie cudaŭ, jak Biełaruś, čałaviek pad nahladam nie moža znachodzicca, kali jon nie sudzimy. Tamu ja byŭ na 100% upeŭnieny, što siońnia previentyŭny nahlad ź mianie zdymuć», — napisaŭ na svajoj staroncy ŭ fejsbuku Vinahradaŭ.