Nasupierak zajavie Łukašenki, studentaŭ zahaniajuć na daterminovaje hałasavańnie
Siońnia pačałosia daterminovaje hałasavańnie na vybarach deputataŭ Pałaty pradstaŭnikoŭ Nacyjanalnaha schodu Respubliki Biełaruś šostaha sklikańnia. «Naša Niva» prajšłasia pa vybarčych učastkach, kab akunucca ŭ atmaśfieru vybaraŭ.
Pačali my z ahladu ŭčastka dla hałasavańnia №548 Kołasaŭskaj vybarčaj akruhi №106, što znachodzicca ŭ adnym z karpusoŭ BNTU. Adrazu ŭ vočy kinułasia šylda, na jakoj źjaviłasia novaja litara ŭ biełaruskim ałfavicie.
Kala ŭvachodu na ŭčastak čarha sa studentaŭ. Pytajemsia ŭ dziaŭčyny, što staić apošniaj, navošta jana pryjšła. Taja saramliva adkazvaje: «Nam tak skazali, abiacali adpuścić dadomu, kali prahałasujem daterminova». Za kaho buduć hałasavać, bolšaść u čarzie jašče nie vyrašyła.
Raptam u kancy kalidora razdajecca hučny dziavočy hołas: «Chto choča źjechać raniej, prahała…» Ale dziaŭčyna nie zaviaršaje dumku, zaŭvažaje kamieru.
Na ŭčastku №550, jaki znachodzicca pobač, u internacie BNTU, situacyja kantrasnaja — za 15 chvilin nichto nie pryjšoŭ hałasavać.
Učastak №687 znakamity tym, što ŭ čas prezidenckich vybaraŭ svoj hołas možna było abmianiać na paŭtaralitrovuju butelku piva. Ale siońnia razdajuć ściažki z emblemaj zavoda «Krynica», jakija staršynia kamisii staranna chavaŭ ad kamiery.
Pieršaje, što my bačym, — nad pałatkami dla hałasavańnia zavis elektryk, jaki mianiaje lampački. Hetu situacyju nas taksama prosiać nie zdymać.
A naziralnikam sumna — jany razhadvajuć kryžavanku.
Dalej my ruchajemsia ŭ Pałac kultury MTZ, u punkt dla hałasavańnia №700. Tut taksama hałasujuć vyklučna studenty MDEU imia Sacharava: kažuć što ich «paprasili», ale vychodnyja za hołas nie abiacali.
Za ŭvieś dzień na ŭčastkach dla hałasavańnia my nie ŭbačyli nivodnaha achvotnaha prahałasavać, akramia studentaŭ.
Apytanka
