Piać faktaŭ pra Isłama Karymava, jaki kiravaŭ Uźbiekistanam 26 hadoŭ
2 vieraśnia Uźbiekistan abviaściŭ pra śmierć Isłama Karymava, jaki kiravaŭ krainaj 26 hadoŭ. Bi-bi-si jašče ŭ paniadziełak, paśla taho jak stała viadoma pra insult, sabrała piać samych jarkich faktaŭ ź jaho žyćcia i pracy.
Karymaŭ — adzin ź niamnohich lidaraŭ, što kiravaŭ z savieckich časoŭ
U 1989 hodzie partyjny pravadyr Uźbiekistana Rafik Nišanaŭ byŭ pieraviedzieny ŭ Maskvu, Karymaŭ staŭ jaho pierajemnikam i ŭznačaliŭ respubliku.
Isłam Karymaŭ pieršym z kiraŭnikoŭ savieckich respublik prymieryŭ na siabie tytuł prezidenta. Prezidentam Uźbiekistana jon byŭ abrany na siesii Viarchoŭnaha Savieta Uźbiekskaj SSR 24 sakavika 1990 hoda.
Choć kanstytucyja Uźbiekistana nie dazvalaje adnamu čałavieku być kiraŭnikom krainy bolš za dva terminy zapar, Karymaŭ niaźmienna zastavaŭsia la styrna ŭsie hetyja hady.
Heta stała mahčymym dziakujučy niekalkim refierendumam, u vyniku jakich padaŭžaŭsia termin znachodžańnia prezidenta va ŭładzie. Paśla kožnaha refierendumu ŭłady abjaŭlali, što adlik pačynajecca z čystaha lista, i Karymaŭ kožny raz abiraŭsia.
Pavodle jaho zahadu ŭ Andyžanie byli zabityja dziasiatki pratestoŭcaŭ
U pravaabarončych kołach Isłam Karymaŭ ličycca adnym z samych žorstkich dyktataraŭ sučasnaści. «Reparciory bieź miežaŭ» u svaich acenkach navat nazyvali jaho «ściarviatnikam», razam z prezidentam Zimbabve Robiertam Muhabe i lidaram Paŭnočnaj Karei Kim Čen Ynam.
Samaj kryvavaj trahiedyjaj za hady kiravańnia Karymava staŭ razhon demanstracyi ŭ horadzie Andyžan 13 maja 2005 hoda. Biazzbrojny natoŭp byŭ akružany ŭradavymi vojskami, i sałdaty adkryli ahoń. Pa aficyjnych dadzienych, zahinuli 187 čałaviek.
Tysiačy ludziej vyjšli tady na centralnuju płošču Andyžana z patrabavańniami palapšeńnia ŭmoŭ žyćcia i pradastaŭleńnia hramadzianskich svabodaŭ.
Tady Karymaŭ śćviardžaŭ, što ŭ Andyžanie adbyłasia sproba isłamisckaha paŭstańnia, ale što zahadu stralać nichto nie addavaŭ.
Pa hety dzień u zamiežnaj presie źjaŭlajucca paviedamleńni pra sistematyčnaje parušeńnie pravoŭ čałavieka va Uźbiekistanie, ab žorstkim spynieńni apazicyjnych nastrojaŭ i ab katavańniach palityčnych źniavolenych.
Bieź pierajemnika. U Karymava niama syna i składanyja adnosiny z dočkami
Synoŭ u Isłama Karymava niama.
Samym viadomym členam siamji Isłama Karymava zastajecca jaho starejšaja dačka Hulnara.
Kaliści jana była ŭ liku najbolš upłyvovych ludziej Centralnaj Azii. Jana zajmałasia biznesam, śpiavała, vystupała ŭ jakaści madeljera adzieńnia, jeździła sa svaimi kalekcyjami na tydni vysokaj mody ŭ Ńju-Jork, siabravała z rasijskimi i ŭźbiekistanskimi aliharchami, i ŭpłyvała na palityku svajho baćki.
Ale ŭ 2013 hodzie i ŭpłyvu i jaje impieryi pryjšoŭ kaniec.
Suprać jaje na Zachadzie prahučali abvinavačvańni ŭ admyvańni hrošaj. U samim Uźbiekistanie Hulnara apynułasia pad chatnim aryštam.
Pra inšych čalcoŭ prezidenckaj siamji viadoma mała. Jaho małodšaja dačka Łoła ŭznačalvaje dabračynny Fond «Ty nie samotny», jaki dapamahaje dzieciam z parokami serca. Ab žoncy Karymava Taćcianie praktyčna ničoha nieviadoma.
Ekanomika Uźbiekistana trymajecca na bavoŭnie i mihrantach, što dasyłajuć dadomu hrošy
Pry Karymavie spynili pracu mnohija bujnyja savieckija pradpryjemstvy, u apošnija hady haz i elektryčnaść padajucca ź pierabojami, nacyjanalnaja valuta — sum — zastajecca niestabilnaj.
Pry hetym Uźbiekistan bahaty na pryrodnyja resursy, ekspartuje naftu i haz, a taksama ŭvachodzić u piaciorku najbujniejšych vytvorcaŭ bavoŭny. Pa raźviedanych zapasach zołata kraina znachodzicca na čaćviortym miescy ŭ śviecie, a pa ŭzroŭni zdabyčy — na dziaviatym.
Pavodle acenak ekśpiertaŭ, klimat dla viadzieńnia biźniesu ŭ krainie vielmi niespryjalny. U štohod publikavanych mižnarodnaj niaŭradavaj arhanizacyjaj Transparency International rejtynhach karupcyi ŭ śviecie Uźbiekistan stabilna zajmaje miesca ŭ rajonie 150 radka.
U suviazi z ekanamičnymi ciažkaściami nie mienš za 10% pracazdolnaha nasielnictva pracujuć za miažoj. 58% ź ich adpraŭlajucca na zarobki ŭ Rasiju, a astatnija ŭ Kazachstan, AAE, Turcyju, Paŭdniovuju Kareju i krainy Jeŭropy.
Uźbiekistan zaŭsiody łaviravaŭ pamiž Rasijaj i Zachadam i mieŭ niaprostyja adnosiny z susiedziami
Najvažniejšym palityčnym i ekanamičnym partnioram Uźbiekistana zastajecca Rasija.
U śniežni 2014 hoda Rasija i Uźbiekistan padpisali pahadnieńnie ab urehulavańni ŭzajemnych finansavych abaviazacielstvaŭ, na padstavie jakoha Maskva śpisała Taškientu paradku 95% doŭhu (bolš jak 860 młn dalaraŭ).
Rasija — asnoŭny handlovy partnior Uźbiekistana: na jaje prychodzicca 27,5% mižnarodnaha handlu krainy.
Samyja składanyja adnosiny va uźbiekskich uładaŭ — z Tadžykistanam. U apošnija hady ich navat nazyvajuć svojeasablivaj chałodnaj vajnoj.
Uźbiekistan vystupaje suprać praktyčna ŭsich vodna-enierhietyčnych inicyjatyŭ Dušanbe i budaŭnictva bujnych HES u Tadžykistanie i Kyrhyzstanie.
Taškient vykazvaje bojaź, što dadatkovyja stancyi vykličuć surjoznyja ekałahičnyja prablemy ŭ rehijonie i pryviaduć da niedachopu vady dla spažyvańnia i arašeńnia va Uźbiekistanie, Kazachstanie i Turkmienistanie.
Na mnohich učastkach miaža pamiž Uźbiekistanam i Tadžykistanam zaminiravana, što stvaraje surjoznyja ciažkaści miascovamu nasielnictvu.
Najvažniejšym palityčnym i ekanamičnym partnioram Uźbiekistana zastajecca Rasija.
