Zamki VKŁ zamiest pakiemonaŭ
U Biełarusi prezientavany pieršy prajekt dapoŭnienaj realnaści.
Fond «Kraina zamkaŭ» pradstaviŭ novy prajekt dapoŭnienaj realnaści «Zamki VKŁ». Na dumku aŭtaraŭ, heta budzie praryŭ u turindustryi Biełarusi.
Prajekt dapoŭnienaj realnaści pracuje pa pryncypie papularnaj mabilnaj hulni ŭ pakiemony. Dla jaje dastatkova mieć smartfon abo płanšet sa śpiecyjalnaj prahramaj, jakoje čytaje QR-kody. Dziakujučy admysłovym kodam čałaviek moža ŭbačyć na svaich hadžetach 3D-madeli zamkaŭ, chramaŭ, razburanych kvartałaŭ.
«Nou-chau prajekta zaklučajecca ŭ tym, što my možam demanstravać 3D-madeli absalutna ŭ lubym miescy, bieź ziemleadvodu, lićcia płastykavych kanstrukcyj, afarboŭki. Heta ŭ korani vyrašaje prablemu demanstracyi pomnikaŭ architektury. Bo ŭ nas mnohija abjekty tatalna razburanyja. Kali raniej čałavieku treba było ŭklučać ujaŭleńnie, kab ich ujavić, dyk ciapier z dapamohaj prahramy dapoŭnienaj realnaści možna na svaje vočy ŭbačyć, jak vyhladali toj ci inšy staradaŭni zamak, razburanyja kvartały nie tolki źniešnie. Z dapamohaj prahramy možna rekanstrujavać navat interjery», - raskazvaje dyrektar fondu «Kraina zamkaŭ» Aleś Varykiš.
Prajekt dapoŭnienaj realnaści «Zamki VKŁ» byŭ pradstaŭleny 27 žniŭnia padčas prezientacyi Parku minijaciur zamkaŭ i chramaŭ Vialikaha Kniastva Litoŭskaha, jakaja adbyłasia ŭ falvarku Radzievičy Ašmianskaha rajona. U prezientacyi ŭziali ŭdzieł kala 150 čałaviek. Haściam byli pradstaŭlenyja madel Kamianieckaj viežy, frahmient Kamajskaha kaścioła-krepaści, a taksama 3D-drukarki, na jakich drukujucca minijaciury. Adna z drukarak była niadaŭna nabytaja ŭ miežach kampanii pa zbory srodkaŭ na placoŭcy Talaka.by.
Na siońniašni dzień u kampanii pryniali ŭdzieł 79 čałaviek, jakija sabrali 69% nieabchodnaj sumy. «Zbor srodkaŭ praciahvajecca, my pa-raniejšamu majem patrebu ŭ padtrymcy. Aktyŭnaść ludziej havoryć pra toje, što jość vialikaja cikavaść da stvareńnia parku minijaciur. Tamu jość enierhija, kab praciahvać prajekt i dalej ruchacca», - padkreśliŭ Aleś Varykiš.
20 fundataram, jakija ŭdzielničali ŭ prezientacyi, byli ŭručany padarunkavyja siertyfikaty na naviedvańnie budučaha parka minijaciur i pasłuhi fondu «Kraina zamkaŭ». Zaviaršyłasia mierapryjemstva vystupleńniem viadomaha muzyki Źmitra Vajciuškieviča.
