Sienatar Marzaluk: Anieksijaj Kryma i dziejańniami na Danbasie Rasija razburyła ŭschodniesłavianskaje adzinstva
Anieksijaj Kryma i dziejańniami na Danbasie Rasija razburyła ŭschodniesłavianskaje adzinstva, zajaviŭ viečaram 25 žniŭnia na sustrečy z vybarščykami kandydat u deputaty Pałaty pradstaŭnikoŭ pa Mahiloŭskaj-Leninskaj vybarčaj akruzie № 84, člen Savieta Respubliki Ihar Marzaluk.
«Ja liču, što Rasija zrabiła žudasnuju reč. Toje, što isnavała na ŭzroŭni masavaj śviadomaści, — pačućcio ŭschodniesłavianskaj datyčnaści, uschodniesłavianskaha adzinstva — było razburana ŭ adzin dzień», — skazaŭ Marzaluk.
Na jaho dumku, trahiedyja ŭkrainskaha naroda ŭ tym, što jaho «dvojčy kinuli i padmanuli». «Ale brydota i podłaść tych, chto jaho kinuŭ u druhi raz, heta ŭzrovień ich palityčnaj idyjockaj biezadkaznaści, jany stracili terytaryjalnuju cełasnaść krainy. Jany stracili ŭsio toje, što źjaŭlałasia stratehičnym zapasam Ukrainy», — zajaviŭ sienatar.
«Ja nie razumieju, čamu Jacaniuk i Turčynaŭ zajmajuć vysokija pasady da hetaha času. Mienavita jany biez boju zdali Krym, a značyć, pry ich uładzie była parušana terytaryjalnaja cełasnaść Ukrainy. Jany vorahi naroda i zdradniki nacyi. Jany pavinny hnić u turmie, a nie siadzieć u vysokich kabinietach. Heta kali zychodzić z pazicyj ukrainskaha patryjatyzmu», — skazaŭ kandydat u deputaty.
Pavodle jaho słoŭ, ukrainiec, jaki sa zbrojaj u rukach abaraniaje svaju krainu, varty tolki pavahi. «Ukrainiec, kali biare ŭ ruki zbroju i idzie vajavać za terytaryjalnuju cełasnaść krainy, nie moža być abražanym.
Ułada moža być hidkaj, bydlačaj, podłaj, ale jość svoj dom, jość svaja dziaržava, jość svaja radzima. Parašenka — miarzotnik, taki ž jak Janukovič.
Ale jość Ukraina, jość kraina, jość hierb, himn, ściah», — skazaŭ kandydat u deputaty.
Na jaho dumku, ciapier Krym staŭ jašče adnoj terytoryjaj, «jakuju nichto nikoli nie pryznaje i jakuju nichto nikoli nie addaść», i dziejańni Rasii ŭ dačynieńni da Kryma byli absalutna niezakonnymi, niahledziačy na bliskuča praviedzienuju vajennuju apieracyju i žadańnie absalutnaj bolšaści krymčan być rasijanami.
Marzaluk ličyć, što ad situacyi va Ukrainie paciarpieła i ekanomika Biełarusi, u jakoj źniešni handal z paŭdniovaj susiedkaj u 2013 hodzie dasiahaŭ 7,5 młrd. dołaraŭ, a siońnia takoha niama.
Što ž tyčycca pavodzinaŭ biełaruskaha kiraŭnictva ŭ dačynieńni da Ukrainy, to jany, na dumku Marzaluka, pravilnyja, niahledziačy na sajuz z Rasijaj. «Sajuźniki ŭzhadniajuć svaje dziejańni. Ź biełaruskim kiraŭnictvam rasijskaje kiraŭnictva svaje dziejańni nie ŭzhadniała. A my padtancoŭkaj ničyjoj nie budziem. I kali my nie chočam, kab na našaj terytoryi byli čužyja avijabazy, to ich i nie budzie, tamu što nam heta nie treba», — skazaŭ člen Savieta Respubliki.
