Łukašenka daručyŭ hienprakuroru «likvidavać asobnyja niedachopy»
Dakład hienieralnaha prakurora Alaksandra Kaniuka ab stanie kryminahiennaj situacyi i rabocie orhanaŭ prakuratury zasłuchaŭ 23 žniŭnia Alaksandr Łukašenka.
Na mierapryjemstvie taksama prysutničali pradstaŭniki inšych siłavych struktur, kiraŭnictva Administracyi prezidenta i dziaržsakrataryjata Savieta biaśpieki.
Pavodle słoŭ Alaksandra Łukašenki, jakija pryvodzić pres-słužba kiraŭnika dziaržavy, pašyrany farmat mierapryjemstva źviazany ź niadaŭniaj hłybokaj reformaj u pravaachoŭnaj sistemie. «Mianie cikavić praca prakuratury za hety pieryjad času, nakolki jana ŭ novych umovach paśla refarmavańnia i strukturnych pieraŭtvareńniaŭ efiektyŭna funkcyjanuje», — skazaŭ aficyjny lidar.
Jak było adznačana pa vynikach dakładu, u dziejnaści prakuratury majecca tendencyja ŭsio bolšaha pierachodu prakurorskaha nahladu ŭ ekanamičnuju śfieru. Łukašenka «ŭ cełym stanoŭča acaniŭ stan spraŭ u orhanach prakuratury», ale daručyŭ «likvidavać asobnyja niedachopy».
Abmierkavanyja niekatoryja kadravyja pytańni, padrychtoŭka da praviadzieńnia ŭ Minsku ŭ pačatku vieraśnia kaardynacyjnaj narady hienieralnych prakuroraŭ krain SND.
«Što tyčycca kryminahiennaj situacyi, to ŭ paraŭnańni ź minułym hodam jana praktyčna nie źmianiłasia. Razam z tym u jakaści stanoŭčaha momantu adznačajecca mienšaja kolkaść zabojstvaŭ. I ŭ cełym u apošnija hady maje miesca tendencyja skaračeńnia złačynnaści», — havorycca ŭ relizie.
