«Moj arnamient na mašynach, tečkach MUS, formie futbolnaj zbornaj». Hutarka z šerym kardynałam «vyšyvanačnaj revalucyi»
Hety chłopiec na fota — 31-hadovy prahramist z Červienia Pavał Šut. Da prezientacyi novaj formy zbornaj Biełarusi pa futbole, mała chto što pra jaho viedaŭ, ale heta zvyčajna dla šerych kardynałaŭ.
Mienavita z hetaha chłopca paskoryłasia viartańnie ŭ masavuju kulturu Biełarusi arnamientu — jon stvaryŭ toje, što stała katalizataram źjaŭleńnia miehapapularnych «vyšymajek», pryntoŭ na mašynach dy masy inšaha.
Dva hady tamu chłopiec stvaryŭ sajt spampavać.baj, kudy zaliŭ viektarnyja vyjavy biełaruskich arnamientaŭ.
«Viektarnyja» vyjavy — heta stvoranyja z matematyčnym apisańniem karcinki, jakija možna raściahvać, uciskać — ni ad čaho jany nie zhubiać vyraznaść linij i jakaść. Z takim zvyčajna majuć spravu tolki dyzajniery.
I siońnia, kali vy bačycie niedzie prynt ź biełaruskim arnamientam — možacie na 99% być upeŭnienym, što heta arnamient, stvorany Paŭłam.
Prapanujem vam hutarku z chłopcam, u jakoj jon raskazvaje, jak šyroka razyšłasia jahonaja praca i navošta jon heta rabiŭ.
«Ideja stvaryć sajt naradziłasia dva hady tamu, nočču. Zalivaŭ tudy roznyja cikavostki, ale sajt papularnym nie byŭ. I voś niejak ja adčuŭ, što nacyjanalnaja tema robicca papularnaj. A ja ž sam prahramist, malavać taksama lublu. Jak u niekatoraj stupieni dyzajnier, viedaju, jak heta byvaje, kali treba niejki ŭzor, a samomu stvarać jaho doŭha, tamu pačynaješ huhlić. I kab dapamahčy tym, chto zachoča niejak prafiesijna vykarystoŭvać arnamienty, ja vyrašyŭ zrabić ich viektarnymi malunkami. Zmaloŭvaŭ ich sa starych biełaruskich kašul — adpaviednyja fota znachodziŭ u internecie», — ścisła raskazaŭ Pavał pra svaju zadumu.
«Intelektualnaja ŭłasnaść, atrymlivajecca, maja, — kaža dyzajnier. — Ale ja hrošaj nie biaru.
Na sajcie možna pry ściahvańni štości achviaravać — moža raz na miesiac chtości paru baksaŭ i kinie. Ale heta nie istotna. Kudy bolš ciešyć toje, što tysiačy karystajucca tvajoj rabotaj. Naprykład, prahladaŭ tych malunkaŭ — kala 50 tysiač!
A dzie ja tolki ni bačyŭ svaich vyjaŭ: azdableńnie mieniušak u restaranach, na tečkach MUS, na mašynach, «Vyšymajki» Art-Siadziby z maim arnamientam, novaja forma futbolnaj zbornaj — taksama. Viadoma, pryjemna ŭsio heta».
U zadumach Paŭła vypuścić jašče niekalki naboraŭ takich karcinak: praca idzie.
Pavał taksama raskazaŭ nam, što pryčyna jahonaha zachapleńnia ŭsim biełaruskim — sustreča ź biełaruskamoŭnym vykładčykam u školny čas.
«Ja vučyŭsia ŭ Červieni, u škole №3. I chaču asabliva padziakavać Uładzimiru Paŭłaviču Adamoviču — nastaŭniku narodaznaŭstva, jaki taksama zamianiaŭ nastaŭnika movy i litaratury ŭ nas. Dziakujučy jamu ja ŭbačyŭ, što pa žyćci možna razmaŭlać pa-biełarusku. Tady heta było tak niečakana. Vielmi pavažaju jaho za heta, zapomniŭ jaho na ŭsio žyćcio, jon staŭ uzoram», — padzialiŭsia chłopiec.
«Paśla škoły ja pastupiŭ u kaledž, a potym — va ŭniviersitet, Minski linhvistyčny. I tam staŭ vybar, jak razmaŭlać, pa-biełarusku ci pa-rusku. Bo doma ž ja na trasiancy valiŭ.
Vyrašyŭ, što pa-rusku budzie praściej. Ale heta była takaja zhoda z sumleńniem — ja ŭsio roŭna ź siabrami listavaŭsia pa-biełarusku, niejkija natatki svaje taksama na movie vioŭ.
I voś padčas prezidenckich vybaraŭ, słuchajučy vystup Milinkieviča pa telebačańni, ja vyrašyŭ — usio, nijakich adkładańniaŭ, z hetaha ž dnia pierachodžu na movu. Kali chočaš štości źmianić u krainie, dyk pačni ź siabie. Tak dahetul i razmaŭlaju», — raskazaŭ Pavał.
Taksama chłopiec niekali razam sa Źmitrom Saŭkam i hrupaj jašče ź siami čałaviek zajmaŭsia raspracoŭkaj biełaruskaj kampjutarnaj terminałohii, zrabiŭ internet-pryładu «Pravilny ściah» — kali ŭstalavać jaje ŭ braŭzier, to ŭsie čyrvona-zialonyja ściahi ŭ internecie aŭtamatyčna buduć adlustroŭvacca jak bieła-čyrvona-biełyja.
Što ž da šalonaj papularnaści vyšyvanak, to Pavał dumaje tak — heta dobry i niejtralny simvał, jaki zadavalniaje ŭsich, nie ŭ zaležnaści ad palityčnych pohladaŭ.
Siońnia Pavał raić biełarusam być dabrejšymi i dapamahać adzin adnamu.
«Pahladzicie na inšyja narody, jakija arhanizoŭvajucca ŭ supolnaści, stajać adzin za adnaho. Nam taksama tak treba. I jak štości robicie — dyk nie škadujcie vysiłkaŭ. Tvajo zaŭsiody tabie vierniecca».
