50 siłavikoŭ-respublikancaŭ vystupili suprać Trampa: jon nieprydatny dla prezidenctva
Kandydat u prezidenty ZŠA ad respublikancaŭ Donald Tramp adkazaŭ na list 50 siabraŭ partyi, jakija sumniavajucca ŭ tym, što jon zmoža stać hodnym kiraŭnikom dziaržavy. Zajava Trampa apublikavana na jaho aficyjnym pieradvybarnym sajcie.
Fota Reuters.
U svaim liście, apublikavanym u The New York Times, aŭtary lista — byłyja vysokapastaŭlenyja supracoŭniki dziaržaŭnych orhanaŭ i słužbaŭ biaśpieki — zajavili, što nie buduć hałasavać za Trampa.
Na ich dumku, budzie niebiaśpiečna, kali jon stanie prezidentam, pakolki heta «padvierhnie ryzycy biaśpieku i dabrabyt krainy». Jany taksama śćviardžajuć, što miljarderu «nie chapaje charaktaru», kab być prezidentam i aścierahajucca nastupstvaŭ, kali jon stanie hałoŭnakamandujučym krainy.
«Pa našym dośviedzie, prezident pavinien chacieć słuchać svaich daradcaŭ i kiraŭnikoŭ departamientaŭ. Jon pavinien zaachvočvać razhladać kanfliktnyja punkty hledžańnia, pavinien pryznavać pamyłki i vučycca na ich», — napisali aŭtary pasłańnia.
Respublikancy taksama ličać, što Trampu nie chapaje «simvałaŭ, kaštoŭnaściaŭ i dośviedu», kab uznačalić krainu. Na ich dumku, miljarder «asłablaje maralny aŭtarytet ZŠA jak lidara volnaha śvietu».
U adkaz na heta Tramp zajaviŭ, što palityki, jakija padpisalisia pad listom, padčas znachodžańnia na dziaržaŭnaj słužbie svaimi dziejańniami destabilizavali situacyju ŭ śviecie. Na jaho dumku, «jany ŭsiaho tolki vašynhtonskaja elita, što pravaliłasia i choča ŭtrymać uładu». Jon abvinavaciŭ svaich praciŭnikaŭ ŭ rašeńni ZŠA pačać apieracyju ŭ Iraku i źjaŭleńni «Isłamskaj dziaržavy».
Pad listom respublikancaŭ padpisalisia były dyrektar Centralnaha raźviedvalnaha ŭpraŭleńnia (CRU) i Ahienctva nacyjanalnaj biaśpieki (ANB) hienierał u adstaŭcy Majkł Chejden, eks-namieśnik dziaržsakratara i były dyrektar Nacyjanalnaj raźviedki Džon Niehraponte. Aproč ich, list padpisali były prezident Suśvietnaha banka Robiert Zelik, eks-ministr nacyjanalnaj biaśpieki ZŠA Majkł Čertaf i inšyja palityki.
Jany taksama ŭ svaim liście ŭsumnilisia, što ŭ Trampa jość dastatkovaja kolkaść viedaŭ pra «vieru ŭ amierykanskuju Kanstytucyju, zakony i instytuty ZŠA, u tym liku, i ab relihijnaj talerantnaści, svabodzie presy i niezaležnaj sudovaj sistemie».
Respublikancy taksama ličać, što, u vypadku abrańnia Trampa prezidentam, jon staŭ by «samym nierazumnym» kiraŭnikom dziaržavy. Pry hetym jany padkreślivajuć, što ŭ šmatlikich amierykancaŭ «jość sumnieńni z nahody pryznačeńnia [kandydata ŭ prezidenty ZŠA ad Demakratyčnaj partyi] Chiłary Klintan». Adnak, na ich dumku, «Donald Tramp — heta nie adkaz na surjoznyja prablemy Amieryki».
U pačatku žniŭnia ab «žachlivaj niehatovaści» Trampa stać prezidentam zajaviŭ i ciapierašni kiraŭnik ZŠA Barak Abama. Sienatary ad štataŭ Ilinojs, Niebraska i Paŭdniovaja Karalina, jakija ŭvachodziać u Respublikanskuju partyju, taksama zajaŭlali, što jany nie buduć hałasavać za Trampa padčas vybaraŭ 8 listapada.
