Kiraŭnik MZS Litvy vykazaŭsia za niezaležny nahlad za budaŭnictvam Biełaruskaj AES
Litvie varta patrabavać niezaležnaha nahladu za budaŭnictvam Biełaruskaj AES u Astraŭcy. Pra heta, jak paviedamlaje BNS, zajaviŭ 26 lipienia ministr zamiežnych spraŭ Linas Linkiavičus, kamientujučy incydent na budaŭničaj placoŭcy atamnaj stancyi, jakaja ŭzvodzicca pablizu litoŭskaj miažy.
Pavodle słoŭ Linkiavičusa, taki nahlad nieabchodny, kab možna było zychodzić nie z čutak, a z dakładnych dadzienych ab situacyi na AES.
Jak skazaŭ ministr, va ŭrada Litvy vyklikajuć zaniepakojenaść zajavy Minska ab płanach pabudavać AES jak maha chutčej i tańniej, a taksama infarmacyja ŭ ŚMI pra kradziažy budmateryjałaŭ.
Linkiavičus skazaŭ heta paśla taho, jak Ministerstva enierhietyki Biełarusi paćvierdziła, što pry budaŭnictvie AES mieła miesca «niaštatnaja situacyja». U adpaviednaści ź infarmacyjaj, pradstaŭlenaj hienieralnym padradčykam «Atambudekspart», «niaštatnaja situacyja adbyłasia na placoŭcy zachoŭvańnia korpusa reaktara pry praviadzieńni takiełažnych rabot pa jaho pieramiaščeńni ŭ haryzantalnaj płoskaści», havorycca ŭ zajavie Ministerstva enierhietyki Biełarusi.
Ministerstva ŭkazvaje, što zakazčyk prajekta — respublikanskaje ŭnitarnaje pradpryjemstva «Biełaruskaja AES» «nieadkładna zapatrabavała ŭ hienieralnaha padradčyka ŭsie nieabchodnyja dakumienty i źviestki».
«Paśla ŭsiebakovaha vyvučeńnia biełaruskimi śpiecyjalistami pradstaŭlenaj AT «Atambudekspart» infarmacyi budzie prymacca adpaviednaje rašeńnie. Pry hetym biełaruski bok budzie, u pieršuju čarhu, kiravacca nieabchodnaściu biezumoŭnaha zabieśpiačeńnia biaśpieki stancyi, jakaja budujecca», — zajaŭlaje Minenierha.
Urad Litvy abvinavačvaje Biełaruś u tym, što jana nie harantuje pytańni biaśpieki AES. Minsk hetyja pretenzii adchilaje.
