Šeść faktaŭ pra novy «Startrek»
Startrek: Za miežami
Žanr: fantastyka, bajavik, pryhody
Režysior: Džaścin Lin
U rolach: Krys Pajn, Zakary Kuinta, Sajman Pieh, Karł Urban, Zoi Sałdana, Džon Čo, Anton Jelčyn, Idrys Alba, Safija Buteła
ZŠA, 120 chv.
Adznaka: 7
Ekipaž zornaha karabla «Enterprajz» na čale z kapitanam Džejmsam Kirkam byŭ atakavany mahutnaj i niebiaśpiečnaj chvalaj nieviadomych pryšelcaŭ.
Zachopniki pad kiraŭnictvam Kroła źniščajuć karabiel, pakidajučy kamandu biez srodkaŭ da isnavańnia na nieviadomaj płaniecie, dzie jana (kamanda) akazvajecca ŭ kanflikcie z novym biaźlitasnym voraham.
Ale da Kirka, Spoka i jaho pamočnikaŭ dałučajecca niečakanaja sajuźnica.
Treci film pierazapuščanaj sieryi i trynaccaty poŭnamietražny film navukova-fantastyčnaj franšyzy «Zorny šlach». Padziei raźvivajucca praz 3 hady paśla pačatku piacihadovaj misii «Enterprajza».
Adzin z aŭtaraŭ scenara Rabierta Orsi zajaviŭ, što siužet filma adpaviadaje duchu franšyzy i razhortvajecca ŭ kłasičnym suśviecie «Zornaha šlachu».
«U hetym filmie poŭna idej, jakija možna prymieryć na naša žyćcio i ciapierašniaje hramadstva. Adna ź ich — razam my macniejšyja. I heta mocna rezaniruje z hledačami», - padzialiŭsia mierkavańniem viadučy akcior adnoŭlenaj franšyzy Zakary Kuinta.
Krys Pajn i Zakary Kuinta paŭtorać svaje roli ŭ jakaści kapitana Džejmsa T. Kirka i kamandara Spoka.
Brytanski komik Sajman Pieh, vykanaŭca roli kiraŭnika inžyniernaj słužby Manthomiery Skota, źjaŭlajecca taksama adnym sa scenarystaŭ prajekta. Rolu hałoŭnaha złodzieja vykanaŭ uładalnik «Załatoha hłobusa», brytaniec Idrys Elba.
Anton Jelčyn (sprava)
Trahičny los napatkaŭ amierykanskaha kinaakciora rasijskaha pachodžańnia Antona Jelčyna da vychada filma u šyroki prakat. 19 červienia 2016 jon byŭ znojdzieny miertvym kala svajho doma ŭ Łos-Andželesie.
Pakul nie jasna, jaki los čakaje jaho piersanaža Paŭła Čechava. Imavierna, jon pojdzie na pavyšeńnie ci prosta skončyć słužbu, ale pradziusar Džej Džej Abrams nie admaŭlaje mahčymaści taho, što hieroj budzie zabity.
Heta pieršy film franšyzy «Zorny šlach», jaki zdymali nie ŭ Halivudzie, a ŭ Vankuviery (Kanada). U studyi byli z nula adnoŭlenyja ŭsie dekaracyi, uklučajučy ŭnutranaje ŭbrańnie karabla «Enterprajz».
Treci film akazaŭsia słabiejšym za pieršyja častki i vyhladaje chutčej jak padrychtoŭka da čaćviortaj stužki, dzie scenarysty abiacajuć bolšy dramatyčny nakał. Upieršyniu za pastanoŭku filma suśvietu «Zornaha šlachu» uziaŭsia tajvanski režysior Džaścin Lin, jaki dahetul zajmaŭsia šmatlikimi «Farsažami».
U stužcy zachavaŭsia bałans pamiž ekšn-scenami i dyjałohami, ale apošnija vyhladajuć natužna i nie raskryvajuć usiu hłybiniu ŭzajemadziejańnia piersanažaŭ, nie kažučy ŭžo pra sapraŭdny dramatyzm.
Tak, adnosiny pamiž Kirkam i Spokam, na jakich zvykła trymajecca siužet, pakazanyja mała i błaha adpracavanyja.
Zdymki
Cikava, što ŭ filmie źjaŭlajecca niečakany pakłon u bok hik-fenaŭ suśvietu «Zornaha šlachu». Novaje vykarystańnie niepapularnaj muzyki pryjemna ździvić fanataŭ i šarahovych hledačoŭ.
Navukova-fantastyčnyja franšyzy nabližajucca da masavaha hledača.
Treciaja častka «Zornaha šlachu» — chutčej zabaŭlalnaje kino, tolki źlohku abciažaranaje vysokimi idejami.
