Paralimpijec Oskar Pistoryus asudžany na šeść hadoŭ
Oskara Pistoryusa asudzili na šeść hadoŭ turmy za zabojstva svajoj siabroŭki. Abvinavačvańnie było pierakvalifikavana ź nienaŭmysnaha na naŭmysnaje zabojstva. Sud ŭličyŭ pry vyniasieńni prysudu źmiakčalnyja abstaviny.
AP
Sud u paŭdniovaafrykanskim horadzie Pretoryja pryhavaryŭ da šaści hadoŭ turmy paralimpijca Oskara Pistoryusa, pryznaŭšy jaho vinavatym u zabojstvie svajoj siabroŭki Ryvy Stenkamp, paviedamlaje The Independent.
Vynosiačy prysud, sudździa Takazile Masipa adznačyła, što źmiakčalnyja abstaviny, u tym liku raskajańnie, pieraviešvajuć abciažarvajučyja.
Paśla vyniasieńnia prysudu spartsmien byŭ adpraŭleny ŭ turmu prosta z zały suda. Baki abvinavačvańnia i abarony zajavili pra namier padać apielacyju na prysud.
U kastryčniku 2014 hoda Pistoryus byŭ asudžany na piać hadoŭ pazbaŭleńnia voli pa hetaj spravie. Sud pryznaŭ jaho vinavatym u nienaŭmysnym zabojstvie. Praz hod Pistoryus byŭ pieraviedzieny z turmy pad chatni aryšt pa chadajnictvie ab umoŭna-daterminovym vyzvaleńni.
U śniežni 2015 hoda pa patrabavańni prakuratury abvinavačvańnie było pierakvalifikavana ŭ naŭmysnaje zabojstva, za jakoje praduhledžana 15 hadoŭ pazbaŭleńnia voli.
Złačynstva było ździejśniena 14 lutaha 2013 hoda. Pistoryus čatyry razy streliŭ u Stenkamp praz zamknionyja dźviery vannaj. Spartsmien u svajo apraŭdańnie kazaŭ, što pryniaŭ svaju siabroŭku za starońniaha čałavieka, jaki zalez u jaho dom, i stralaŭ spałochaŭšysia.
U Pistoryusa amputavanyja abiedźvie nahi. Za svaju spartyŭnuju karjeru jon vyjhraŭ šeść załatych miedaloŭ Paralimpijskich hulniaŭ.