Isłandski cud skončyŭsia brutalnym razhromam ad Francyi — 2:5
Lubaja kazka rana ci pozna skančvajecca. Isłandskaja saha pra 23 hierojaŭ-futbalistaŭ skončyłasia 3 lipienia na stadyjonie Sen-Deni ŭ Paryžy.
Isłandyja rychtavałasia dać boj francuzam, hroznym haspadaram Jeŭra. Hetak ža, jak biłasia z Partuhalijaj, Vienhryjaj, Aŭstryjaj i Anhlijaj. Nivodzin z tych matčaŭ Isłandyja nie prajhrała. Ale ŭ čverćfinale ŭsio ad pačatku pajšło nie tak.
Užo na 12-j chvilinie napadnik francuzaŭ Aliŭje Žyru adhuknuŭsia na pieradaču z centra pola i vyskačyŭ da varot Isłandyi. Streł pamiž noh bramniku byŭ daskanałym pa dakładnaści.
Na 20-j chvilinie francuzy skarystalisia zbrojaj Isłandyi — standartnym stanoviščam. Paśla padačy z kutniaha hałavoj zabiŭ Pol Pahba.
A pierad pierapynkam isłandcy razvalilisia kančatkova. Za dźvie chviliny paśpieli adznačycca Dzimitry Paje i Antuan Hryzman, jakija viaduć miž saboj zavočnaje spabornictva za zvańnie najlepšaha snajpiera Jeŭra.
Nielha skazać, što treniery Isłandyi źmirylisia z razhromnaj parazaj. Dźvie zamieny, zroblenyja ŭ pierapynku, natchnili futbalistaŭ na hoł prestyžu — na 56-j chvilinie adznačyŭsia Kalbiejn Sihtarsan.
Francuzy pačali hulać ŭ režymie aščadžeńnia siłaŭ. Adnak navat hetaha chapiła, kab adhruzić piaty hoł. Usio ž Aliŭje Žyru taksama choča stać najlepšym snajpieram.
Apošniaje słova zastałosia za isłandcami. Birkir Bjarnason pastaviŭ kropku ŭ matčy — 5:2.
Niezaležna ad kančatkova vyniku dakarać isłandcaŭ nie varta — jany i tak skočyli vyšej za hałavu.
A francuzaŭ čakaje paŭfinalnaja bitva z Hiermanijaj.
