Andrej Dyńko: Što vychad Brytanii źmianiaje dla Biełarusi
Što adbudziecca, kali krainy Jeŭropy i ZŠA pačnuć «zajmacca sami saboj» i pierastanuć raźvivać prajekt «Vialikaj Jeŭropy»? Biełaruś tady adychodzić na pieryfieryju ŭvahi. Na pieryfieryju dla ŭsich, akramia Rasii ź jaje vialikimi mahčymaściami ŭpłyvu i Polščy dy Litvy ź ich nievialikimi.
Ničoha dobraha ŭ tym dla Biełarusi niama. Čym słabiejšy ES, tym słabiejšaja i Biełaruś; čym macniejšy ES, tym macniejšyja ekanomika i suvierenitet Biełaruś, hetaja zaležnaść budzie validnaja u nastupnyja hady.
Vychad Brytanii sapraŭdy zmušaje adny krainy i padšturchoŭvaje druhija «zaniacca saboj».
U toj ža čas Rasija budzie staracca adkałoć ad ES i inšyja krainy — Hrecyju, naprykład.
Dla Jeŭrapiejskaha Sajuza vychad Brytanii aznačaje, što jon stanie inakšy. Biez Brytanii heta budzie bolš kantynientalny, mienš atłantyčny sajuz. Zrešty, nielha vyklučać novy refierendum u Brytanii praź niekatory čas, kali brytancy sami pabačać nastupstvy svajho kroku. Tolki da taho času, mahčyma, z Brytanii vyjdzie, a da ES dałučycca Šatłandyja, jakaja masava hałasavała za ES, i heta budzie impuls da drabnieńnia krain ES.
U toj ža čas vychad Brytanii praćvierazić bruselskuju biurakratyju i tym samym moža dapamahčy zrabić Jeŭrasajuz bolš ekanomnym i efiektyŭnym.
Vychad Brytanii — heta taksama pazityŭny fakt, što ź ES možna vyjści mirnym i demakratyčnym šlacham, u vypadku kali ES pierastaje zadavalniać nacyjanalnyja intaresy. SSSR razvaliŭsia, bo ź jaho niemahčyma było vyjści. A tut hetaja opcyja vychadu zaŭždy budzie strymlivać i azdaraŭlivać.
U kožnym razie, vychad Brytanii nie źniščaje vialikaj idei Jeŭrasajuza — novaj formy abjadnańnia dziaržaŭ, pry jakoj niama adnoj daminujučaj nacyi, a nacyjanalnyja kultury zachoŭvajucca. U hetym adroźnieńnie ES i ad ZŠA, i Jeŭrazijskaha sajuza. Z Brytanijaj ci biez Brytanii, taki sajuz zastaniecca pryvabny i dla biełarusaŭ.
