Školnik z Mazyra pahražaŭ padarvać aeraport
Padletak z Mazyra «zaminiravaŭ» Nacyjanalny aeraport Minsk, zapatrabavaŭšy miljon dalaraŭ i viertalot, paviedamiła aficyjny pradstaŭnik Homielskaha abłasnoha ŭpraŭleńnia Śledčaha kamiteta Maryja Kryvanohava.
Pavodle papiaredniaj infarmacyi, 15-hadovy školnik ŭviečary 22 maja, znachodziačysia ŭ kampanii adnahodkaŭ, paprasiŭ u siabroŭki mabilny telefon, ź jakoha patelefanavaŭ u MNS. Jon paviedamiŭ dziažurnamu, što Nacyjanalny aeraport Minsk zaminiravany, a jamu terminova patrebien miljon dalaraŭ i viertalot, inakš praź niekalki chvilin aeraport uźlacić u pavietra.
Mazyrskija milicyjanty apieratyŭna vyličyli numar, ź jakoha byŭ ździejśnieny zvanok, vyśvietlili asobu niepaŭnaletniaha «terarysta».
Pa słovach Maryi Kryvanohavaj, pryčynu svajho ŭčynku školnik patłumačyŭ prosta — chacieŭ pažartavać. U dačynieńni da padletka raspačataja kryminalnaja sprava za zahadzia iłžyvaje paviedamleńnie ab niebiaśpiecy, adkaznaść pa hetym artykule KK nadychodzić z 14 hadoŭ.