Ministr kultury Barys Śviatłoŭ: Na žal, mastackaj cenzury ciapier niama
Ministr kultury Barys Śviatłoŭ pryniaŭ udzieł u prahramie «Bujnym płanam» na telekanale «Biełaruś-1». Pryvodzim niekatoryja zajavy čynoŭnika. Darečy, vystupaŭ jon pa-rusku.
Pra cenzuru
Na žal, ja pavinien kanstatavać, što ŭ nas kulturnaj i mastackaj cenzury niama. Ja kažu «na žal». Čamu? Tamu što cenzura moža isnavać u roznych formach — heta moža być mastackaja krytyka, moža być praca redaktara, moža być unutranaja samacenzura. Kali my admaŭlalisia ad palityčnaj cenzury, razam z hetym vyplesnuli i dzicia z brudnaj vadoj. My admovilisia ad mastackaj cenzury i źmienšyli ŭzrovień patrabavalnaści da mastackich tvoraŭ. Ministerstva kultury mahło b ažyćciaŭlać hetu funkcyju, ale naša funkcyja — stvaryć umovy dla raźvićcia talentaŭ. Dobra kali b tvorčyja sajuzy mahli na siabie ŭziać funkcyju mastackaj cenzury.
Pra «čornyja śpisy»
Takoha śpisu nie isnuje ni ŭ jakim vyhladzie. U nas isnuje śpis tych kalektyvaŭ i muzykantaŭ, jakich my zaŭsiody zaprašajem i jakija vystupajuć na našych mierapryjemstvach. Usie inšyja, jakija nie traplajuć… Jak praviła heta ŭzrovień, jaki jašče treba… kab jany daraśli, ŭ tym liku i ŭ palityčnaj śviadomaści.
Pra «Svabodny teatr»
Heta tema palityčnych technałohij. Nakolki ja razumieju, palittechnołahi buduć vykarystoŭvać lubyja kanały, u tym liku i formy mastactva ci nibyta mastactva, kab pravieści tuju ci inšuju palityčnuju ideju.
Pra raźmierkavańnie dachodaŭ
Tyja ludzi, jakija stvarajuć vysokuju kulturu, atrymlivajuć mienš za tych, chto, skarystaŭšysia plonam ich tvorčaści i prykłaŭšy nie samyja vialikija namahańni, pačynajuć zarablać našmat bolšyja hrošy. Mnie zdajecca, što šou-biznesu treba było b padzialicca častkaj svaich dachodaŭ z pradstaŭnikami vysokaj kultury.
Pra dvojčy represavanaha baćku
U bijahrafii majho baćki byli dźvie represii. Pieršaja źviazana z tym, što jon zastaŭsia ŭ Minsku na akupavanaj terytoryi i ŭžo paśla vajny nios ciažar pakarańnia. U toj čas u siamji źjaviŭsia siabar — Michaił Haračun, jaki zajmaŭsia pytańniami minskaha padpolla, i mienavita dziakujučy jamu i byŭ reabilitavany moj baćka.
Ale jon byŭ represavany dvojčy. U kancy 1960-ch byŭ čas, kali paśla adlihi nadyšoŭ znoŭ čas zamarazkaŭ. I kab čaho nie zdaryłasia, baćku prybrali z telebačańnia.
Uładzimir Śviatłoŭ (1926—2010) pracavaŭ dyktaram na Minskim radyjovuźle. Aryštavany ŭ 1944 i asudžany za «antysavieckuju ahitacyju» da 10 hadoŭ łahieraŭ. Padčas «pražskaj viasny» 1968 hoda byŭ zvolnieny z BT. Reabilitavany ŭ 1971 hodzie, staŭ pracavać na «Biełaruśfilmie». Razam ź Mikałajem Kalininym jon źniaŭ viadomyja filmy «Korcik» i «Bronzavaja ptuška». U 2000-ja vydaŭ aŭtabijahrafičnuju knihu apaviadańniaŭ Śviatłova «Niezabyŭnaje».