Supierkambek: Biełaruś – Słavakija – 4:2!
Naša zbornaja praviała čaćviorty matč na čempijanacie śvietu pa chakiei, jaki prachodzić u Rasii. U papiarednich matčach biełarusy atrymali try parazy, prapuściŭšy ažno 20 šajb (bolš za ŭsich!).
Možna skazać, što hulnia sa Słavakijaj była vyrašalnaj dla chłopcaŭ Dejva Ljuisa. Tolki dziakujučy pieramozie nad słavakami ŭ našych zastavaŭsia šaniec na vychad u 1/4 finała.
Biełarusy pačali hulniu kali nie kiepska, to prynamsi ničoha nadzvyčajnaha nie demanstravali. Za pieršy pieryjad našy nanieśli 6 kidkoŭ pa varotach supiernika, a taksama nie realizavali kolkasnuju pieravahu 5 na 3.
Słavaki, naturalna, nie chapali zorak ź nieba, ale vyhladali bolš upeŭniena. I ŭ druhim pieryjadzie heta dało plon. Užo na pieršaj chvilinie pieryjada Siekiera vyvieŭ supiernikaŭ napierad, a na 36-aj Jurča zrabiŭ pieravahu bolš pierakanaŭčaj – 2:0.
Biełarusy ž vyhladali vielmi słaba. Za dva apošnija čempijanaty śvietu my advykli ad takoj biazvolnaj hulni biełarusaŭ.
Ciažka skazać, što zdaryłasia z kamandaj u trecim pieryjadzie. Ale heta była absalutna inšaja kamanda. Hataviec spačatku adradziŭ nadzieju ŭ sercach zaŭziataraŭ. Paśla Haŭrus zakinuŭ svaju šajbu ŭ mienšaści.
I ŭ rešcie rešt Ściapanaŭ vyvodzić Biełaruś napierad. Trenier słavakaŭ biare tajm-aŭt, ale ŭžo pozna. Słavaki tak i nie zmahli pryjści ŭ siabie. Šarl Linhle robić pieramohu Biełarusi faktam – 4:2. Treci pieryjad – lepšy pa vykanańni ŭ našaj kamandy na picierskim čempijanacie.
Nastupny matč našy praviaduć 13 maja z Hiermanijaj. Pačatak a 20:15.
