U Minsku źjavicca aleja sakury
Aleja sakury budzie zakładzienaja ŭ Minsku 12 maja, paviedamili arhanizatary.
Uračystaja cyrymonija zakładki alei, prymierkavanaja da 30-hodździa avaryi na Čarnobylskaj AES i 5-hodździa avaryi na atamnaj elektrastancyi «Fukusima-1», adbudziecca ŭ Parku družby narodaŭ.
120 sadžancaŭ sakury, pryznačanych dla pasadki ŭ parku, byli pieradadzienyja ŭ dar japonskaj kampanijaj JT (Japan Tobacco) u znak dobrych siabroŭskich stasunkaŭ Japonii i Biełarusi. Prymajučym bokam vystupiła Ministerstva pa nadzvyčajnych situacyjach Respubliki Biełaruś. Jašče 30 sadžancaŭ buduć pieradadzienyja ŭ dar Parku vysokich technałohij. Padtrymku prajektu akazała ZTAA «Džapan Tabaka Internešnł EsEndDzi» (Biełaruś), jakoje źjaŭlajecca adnoj z kampanij mižnarodnaha padraździaleńnia JT — kampanii JTI (Japan Tobacco International), a taksama ambasada Japonii ŭ Biełarusi.
Padčas cyrymonii budzie ŭstalavany pamiatny znak alei sakury. Vystup hramadskaha abjadnańnia ŭschodniaj kultury i tradycyj «Chahakure» paznajomić haściej z kulturnymi tradycyjami Japonii, źviazanymi z sakuraj.
Sakura (višnia) ličycca adnym z hałoŭnych simvałaŭ Japonii i zaŭsiody zajmała asablivaje miesca va ŭsprymańni japoncaŭ pryrody i navakolnaha śvietu. Spradvieku lubavańnie krasavańniem sakury, jakoje na japonskaj nazyvajecca «chanami», źjaŭlałasia najvažniejšym viasnovym mierapryjemstvam u Japonii. Niadoŭhaje krasavańnie sakury źviazvajuć ź niedaŭhaviečnaściu i efiemiernaściu ŭsiaho žyvoha, u jakim japoncy znachodziać admysłovuju pryhažość i kaštoŭnaść.
Pasadka dreŭ sakury za miežami Japonii časta vykarystoŭvajecca ŭ jakaści dobraha simvała družby z zamiežnymi krainami. Da prykładu, vielmi viadomaj źjaŭlajecca sakura, pasadžanaja bolš za sto hadoŭ tamu na bierazie raki Patamak ŭ Vašynhtonie (ZŠA), dzie kožny hod pravodziać fiestyval sakury. U Biełarusi pasadka sakury pravodzicca ŭžo nie ŭ pieršy raz, ale heta budzie samaja značnaja pa kolkaści dreŭ akcyja.
