Kiraŭniki MZS krain ES 15 lutaha abmiarkujuć pytańnie pa Biełarusi
Pytańnie pa Biełarusi ŭniesiena ŭ paradak dnia sustrečy Rady Jeŭrasajuza pa zamiežnych spravach.
Sustreča adbudziecca 15 lutaha, paviedamili BiełaPAN u pres-słužbie Rady ES. Detalovaj infarmacyi pres-słužba na hety momant nie maje.
Nahadajem, da 29 lutaha ES pavinien vyznačycca nakont dalejšaha losu abmiežavalnych mier u dačynieńni da Biełarusi.
Ciapier dziejničaje rašeńnie ab prypynieńni sankcyj u dačynieńni da 171 fizičnaj i 10 jurydyčnych asob Biełarusi, pryniataje Jeŭrasajuzam 31 kastryčnika 2015 hoda. Dziejańnie sankcyj prypyniena u tym liku ŭ dačynieńni da Alaksandra Łukašenki i jaho starejšych synoŭ Viktara i Dźmitryja, kiraŭnika Centrvybarkama Lidzii Jarmošynaj, ministra infarmacyi Lilii Ananič, staršyni KDB Valeryja Vakulčyka i jaho papiarednika Ściapana Sucharenki. U śpisie pradpryjemstvaŭ značacca «Biełtechekspart», «Biełtech Chołdynh», «Śpiecpryborsiervis», kampanii «Trajpł» i «Rakaŭski brovar», futbolny kłub «Dynama», «Prastor-Trejd», «Akvatrajpł», «KvarcMiełPram», Biarozaŭski kambinat silikatnych vyrabaŭ.
Pad sankcyjami pakul zastajucca čatyry čałavieki, jakich ES ličyć datyčnymi da źniknieńniaŭ apazicyjnych palitykaŭ u 1999—2000 hadach. Heta Uładzimir Navumaŭ (były ministr unutranych spraŭ), Viktar Šejman (były kiraŭnik Administracyi prezidenta), Juryj Sivakoŭ (u pieryjad źniknieńnia palitykaŭ zajmaŭ pasadu kiraŭnika MUS) i Dźmitryj Paŭličenka (kamandzir bryhady śpiecnaza ŭnutranych vojskaŭ MUS).
Termin dziejańnia rašeńnia ab prypynieńni sankcyj zakančvajecca 29 lutaha.