U Izraili ŭ vyniku terakta zahinuŭ plamieńnik redaktara «Sovietskoj Biełorusii» Paŭła Jakuboviča
Izrailskija ŚMI paviedamlajuć, što ŭčora na vajskovych mohiłkach horada Kirjat-Šmona adbyłosia pachavańnie 19-hadovaha staršaha siaržanta MAHAV (pahraničnaj palicyi) Bińjamina Jakuboviča. Na pachavańni prysutničaŭ ministr unutranaj biaśpieki Hiład Erdan.
Trahičnaje zdareńnie adbyłosia 4 listapada na skryžavańni Chalchul, nadaloka ad Chieŭrona. Videakamiery zafiksavali jak mašyna, u jakoj znachodziŭsia teraryst, na vialikaj chutkaści ŭrezałasia ŭ hrupu bajcoŭ pahraničnaj palicyi.
Za styrnom byŭ 23-hadovy žychar Chieŭrona Samir Sakafi. Šachida zastrelili prosta na miescy. U vyniku mocna paciarpieŭ tolki Bińjamin Jakubovič, jaho dastavili ŭ špital «Chadasa Ejn-Karem», ale lekary tak i nie zmahli ŭratavać žyćcio chłopcu.
Orhany aficera MAHAV Jakuboviča pa prośbie siamji byli achviaravanyja tym, chto maje ŭ ich patrebu.
Ministr abarony Izraila Moše Jaałon napisaŭ u svaim facebook: «Padčas vizitu ŭ «Chadasa Ejn-Karem» ja naviedaŭ aficera Bińjamina Jakuboviča, za ličanyja hadziny da taho, jak jon pamior ad atrymanych u vyniku terarystyčnaj ataki ranieńniaŭ. Pobač ź jaho łožkam ja sustreŭ baćkoŭ — Stanisłava i Simonu. Ja pahavaryŭ ź imi, i na mianie vielmi vialikaje ŭražańnie akazała ich dušeŭnaja siła. Siońnia nočču, paśla jaho śmierci, jany abviaścili ab tym, što achviarujuć orhany Bińjamina. Heta — ekstraardynarny humanitarny žest, i hodnaść baćkoŭ pavinna być dla ŭsich nas prykładam i ŭzoram pavodzin».
Siońnia hazieta Administracyi prezidenta «Sovietskaj Biełoruśsija» paviedamiła, što 19-hadovy Bińjamin Jakubovič źjaŭlajecca ŭnučatym plamieńnikam hałoŭnaha redaktara vydańnia Paŭła Jakuboviča.
