Vynik na ŭčastku, dzie dazvolili nazirać za padlikam: za Łukašenku — 54,6%, za Karatkievič — 31,5%
Uładzimir Malarčuk nie prapuściŭ nivodnych vybaraŭ — albo sam bałatavaŭsia, albo naziraŭ. Na hetyja vybary naŭmysna vybraŭ sabie dla nazirańnia samy «skandalny» ŭ minułym učastak u Vilejcy: «Ale sioleta na hetym učastku №6 źmianiŭsia staršynia kamisii, i ŭsie nieparazumieńni, jakija byli, vyrašalisia paluboŭna: my na niešta źviartali ŭvahu — adrazu vypraŭlałasia».
Naziralniki na hetym vybarčym učastku mahli nie tolki spakojna ličyć i źviarać z vynikovym pratakołam kamisii, kolki ludziej prychodziła hałasavać padčas daterminovaha hałasavańnia, ale i… bačyć uvieś praces padliku hałasoŭ!
Uładzimir Malarčuk: «Kali pačaŭsia padlik hałasoŭ, naziralniki ad ułady zastalisia siadzieć tam, dzie ich pasadzili (adkul ničoha nie bačna), a my z kaleham ustali i padyšli da stała. Namieśnik staršyni zahadała: «Siadźcie na svajo miesca!», ale ja adkazaŭ, što siadu i budu pisać zajavu ab pryznańni vybaraŭ na hetym učastku niesapraŭdnymi, bo my nie bačym, za kaho biuleteni. Jana zmoŭkła, i my chadzili vakoł stała i hladzieli, za kaho toj ci inšy biuleteń, ci ŭ toj stos jaho kładuć. Byŭ z našaha boku poŭny kantrol».
Što majem u vyniku? Z 1962 vybarščykaŭ hetaha ŭčastka prahałasavała 1450. Ź ich za Taćcianu Karatkievič svaje hałasy addali 457, albo 31,5% čałaviek, za Alaksandra Łukašenku — 54,6%. Na trecim miescy kandydat «suprać usich» — 111, albo 7,6% hałasoŭ. Dalej iduć Siarhiej Hajdukievič z 42, ci 2,9%, hałasami i Mikałaj Ułachovič z 23, ci 1,6%.
Na ŭčastku №25 Centralnaha rajona Minska naziralniki, u tym liku i mižnarodnyja, tolki zdalok mahli bačyć, jak adbyvajecca padlik hałasoŭ vybarščykaŭ.
Praces padliku hałasoŭ vybarščykaŭ na Hłuskim vybarčym učastku №2 — jak jaho bačyŭ naziralnik.
I jašče infarmacyja ad naziralnikaŭ: na ŭčastku №4 u Maładziečnie za Taćcianu Karatkievič prahałasavała 30,3% vybarščykaŭ, za Alaksandra Łukašenku — 54,3%. Na ŭčastku №7 u Smarhoni za Karatkievič — 29,6%, za Łukašenku — 58,9%.
