Zdymaŭsia ŭ treciaradnych rasijskich sieryjałach, pracavaŭ na NTV i RTR. Piać faktaŭ pra novaha kiraŭnika «Biełaruśfilma»
Siońnia Alaksandr Łukašenka pravioŭ niekalki kadravych pierastanovak. U pryvatnaści, novaha dyrektara atrymaŭ «Biełaruśfilm». Hałoŭnuju kinakampaniju krainy ŭznačaliŭ 57-hadovy Ihar Poršnieŭ. Pra hetaha čałavieka nie tak šmat viadoma, «NN» sabrała cikavyja momanty ź bijahrafii čynoŭnika.
Baćka pracavaŭ na «Biełaruśfilmie»
Ihar Poršnieŭ naradziŭsia 3 lipienia 1958 hoda ŭ Minsku. Skončyŭ siaredniuju škołu №115 na vulicy Kiedyški. Znachodzicca jana faktyčna adrazu za Domam kino. Z kino byŭ ciesna źviazany baćka siońniašniaha pryznačenca – Valancin Poršnieŭ. Jašče ŭ 1960-ch jon byŭ dyrektaram mnohich stužak, što źjaŭlalisia na «Biełaruśfilmie»: «Napieradzie – kruty pavarot», «Maskva – Hienuja», «Chronika nočy». Nie skazać, što heta byŭ vialiki ŭkład u ajčynny kiniematohraf, ale niejki śled usio ž pakinuŭ.
Skončyŭ ekanamičny fakultet VHIKa
Svaju pracu na «Biełaruśfilmie» Ihar Poršnieŭ pačaŭ u 1980-m, adrazu paśla taho, jak skončyŭ ekanamičny fakulteta VHIKa ŭ Maskvie. Aficyjnaja pasada Ihara Valancinaviča hučała jak namieśnik dyrektara, dyrektar zdymačnaj hrupy «Biełaruśfilm». Jak i baćka, jon byŭ dyrektaram mnohich kinastužak. Naprykład, ekranizacyi dobra viadomych «Pryhod Arbuzika i Biabieški» Eduarda Skobieleva, jakija ŭ žanry kino atrymali nazvu «Palot u krainu pačvar». Byŭ dyrektaram adnoj ź sieryj mastackaha filma «Dziaržaŭnaja hranica» – «Salony viecier», jakaja raskazvała ab Prybałtycy 1950-ch.
Hraŭ roli bieź imionaŭ
Nie prajšoŭ Ihar Poršnioŭ mima spakusy samomu pasprabavać siabie ŭ jakaści akciora. U jaho nabiarecca ź dziasiatak rolaŭ u treciaradnych rasijskich sieryjałach i filmach, adnak navat u ich Poršnievu dastavalisia takija piersanažy, jakija nie zasłuhoŭvali ŭłasnaha imia. U filmie «Vykradalniki knih» rola Poršnieva paznačajecca, jak «Taŭstun z kinateatra». U sieryjale «Zakon» novy dyrektar «Biełaruśfilma» ŭźnikaje, jak «Refierent Burava». Znoŭ čałaviek bieź imia. U biełaruska-rasijskim sieryjale «Paskoranaja dapamoha» jon hraŭ «Impresarya». A časam jahonaje proźvišča puskali ŭ citrach tolki ŭ raździele «Epizody». Za ŭsio žyćcio bolš-mienš važnaj roli, jakoj akcior moh by hanarycca, Poršnieŭ tak i nie syhraŭ.
Miescažycharstva Maskva
U sacyjalnych sietkach Ihar Poršnieŭ nie nadta aktyŭny karystalnik. Jaho niama ŭ «Adnakłaśnikach», ni «Ukantakcie». Atrymałasia znajści profil tolki ŭ sacsietcy «Moj [email protected]». Apošni raz jon zachodziŭ na svaju staronku 14 žniŭnia. Cikava, što miescažycharstvam Ihara Poršnieva paznačana Maskva, a na avatarcy staić pravasłaŭny chram z kupałami.
«Moj mir» dazvalaje pabačyć, što čynoŭnik niadaŭna ŭstalavaŭ sabie hulni «Apłot impieryi» i «Pokier».
Admietna, što pad kožnym z troch fotazdymkaŭ Poršnieva raźmieščany adzin i toj ža kamientar: «Poršnieŭ Ihar Valancinavič, zahasicie svaje daŭhi pierad bankam u poŭnym abjomie i źviažyciesia z našym ahienctvam. Pakul vy chavajeciesia i nie płacicie, suma pazyki raście, i paśla budzie spahaniacca prymusova». Ciažka skazać, ci heta spam, ci realnyja prośby.
Pracavaŭ na rasijskich telekanałach
Što tyčycca Maskvy, to sapraŭdy apošnija hady Ihar Poršnieŭ byŭ ciesna źviazany jakraz z rasijskaj stalicaj. U kancy 1990-ch jon navat papracavaŭ pradziusieram na asnoŭnych rasijskich telekanałach – ORT, RTR, NTV.
Pačynajučy ad siaredziny 2000-ch, Poršnieŭ zasnoŭvaje nievialikija pryvatnyja kinakampanii, jak «Pakroŭskija varoty» i «Junajtied Fiłm Kompani». Admietna, naprykład, abiedźvie hetyja kampanii sumiesna z «Biełaruśfilmam» zdymali kino «Voka za voka» ab padziejach 1918 hoda. Poršnieŭ u hetym filmie vystupiŭ u jakaści pradziusiera. Film, jaki ciapier rychtuje Ihar Poršnieŭ, nazyvajecca «U suzorji Stralca» pra znakamitaha savieckaha futbalista Eduarda Stralcova.
Varta adznačyć, što navat pa rasijskich mierkach nazvać hetyja filmy jakasnymi zusim nie atrymlivajecca. Na papularnym rasijskim sajcie kinopoisk.ru filmy, što pradziusiravaŭ Poršnieŭ, atrymlivajuć siaredniuju adznaku ad 4 da 5 z 10 mahčymych.
Što atrymajecca ŭ jaho na «Biełaruśfilmie», chutka pabačym.
